Беларускія лекары правялі ўнікальныя аперацыі і выратавалі нованароджанага

Шанцы немаўляці выжыць ацэньвалі ў 5–6%.

У РНПЦ дзіцячай хірургіі правялі дзве складаныя аперацыі нованароджанаму дзіцяці з цяжкімі прыроджанымі паталогіямі. У немаўляці адсутнічала палова дыяфрагмы, а таксама быў парок сэрца. Для стабілізацыі стану лекары падключылі яго да апарата экстракарпаральнай мембраннай аксігенацыі (ЭКМО).

Як паведамілі ў цэнтры, такое спалучэнне паталогій уяўляе сур'ёзную пагрозу для жыцця. Пры адсутнасці паловы дыяфрагмы дзеці, як правіла, паміраюць у першыя гадзіны пасля нараджэння.

Апарат ЭКМО часова выконваў функцыі сэрца і лёгкіх дзіцяці, падтрымліваючы работу арганізма. Гэта дазволіла лекарам падрыхтаваць немаўля да першай аперацыі. Праз некалькі дзён пасля нараджэння хірургі аднавілі дыяфрагму, выкарыстоўваючы ўласныя мышцы пацыента.

Яшчэ праз тыдзень спецыялісты правялі аперацыю па карэкцыі пароку сэрца. Лячэнне ажыццяўляла мультыдысцыплінарная каманда, у якую ўвайшлі рэаніматолагі, спецыялісты па экстракарпаральным кровазвароце, дзіцячыя хірургі і кардыяхірургі.

Паводле даных РНПЦ, гэта першы ў Беларусі выпадак паспяховага лячэння дзіцяці з такім спалучэннем рэдкіх цяжкіх паталогій. Нават у буйных замежных медыцынскіх цэнтрах верагоднасць выжывання пры адсутнасці паловы дыяфрагмы ацэньваецца ў 5—6%, і пры гэтым гаворка ідзе пра пацыентаў без спадарожнага пароку сэрца.

Цяпер дзіця дыхае самастойна. Яго стан дазваляе рыхтаваць немаўля да выпіскі.