Валеры Леванеўскі: «Нашы грошы будуць ісці ў прэзідэнцкі фонд, за які ніхто ніколі не здае справаздачу»
- 24.10.2007, 17:26
Прэзідэнт Беларусі падпісаў указ № 527, згодна з якім прадпрымальнікі будуць накіроўваць кампенсаванне за шкоду, нанесеную гісторыка-культурным каштоўнасцям, у прэзідэнцкі фонд. Адзін з лідэраў прадпрымальніцкага руху Валеры Леванеўскі лічыць новаўвядзенне завуаляваным падаткам і не выключае новую хвалю пераразмеркавання ўласнасці.
Указ №527 прадугледжвае выплату адлічэнняў за прадпрымальніцкую дзейнасць, якая аказвае непасрэднае ўздзеянне на гісторыка-культурную каштоўнасць або зоны аховы нерухомай матэрыяльнай гісторыка-культурнай каштоўнасці, а таксама выплату кампенсавання за нанесеную шкоду, паведамляецца на сайце прэзідэнта. Дакумент усталёўвае выпадкі і парадак выплаты адлічэнняў і вызначае органы дзяржаўнага кіравання, якія здзяйсняюць кантроль і прымаюць адпаведныя меры пры нявыплаце кампенсавання. Сродкі прадпрымальнікаў будуць накіроўвацца ў фонд прэзідэнта Беларусі па падтрымцы культуры і мастацтва, з якога па рашэнні савета фонду будуць адрасна накіроўвацца на выкананне кампаній па ахове гісторыка-культурнай спадчыны.
– Фактычна – гэта новы від падатку. Толькі яго падача завуаляваная, – сказаў «Салiдарнасцi» адзін з лідэраў прадпрымальніцкага руху Валеры Леванеўскі. – І грошы прадпрымальнікаў будуць ісці не ў бюджэт краіны, а ў прэзідэнцкі фонд, за дзейнасць якога перад намі ніхто ніколі не даваў справаздачу. Акрамя таго, магчыма, будзе чарговая хваля пераразмеркавання ўласнасці. Адны з будынкаў, якія прадстаўляюць гістарычную каштоўнасць, выдаліць, іншыя – засяліць. Чалавека ж можна паставіць у такія ўмовы, калі яму невыгоднае будзе займацца прадпрымальніцкай дзейнасцю.
Суразмоўца дапоўніў, што прадпрымальнікі і да падпісання ўказу выраблялі адлічэнні ў дачыненні аб'ектаў, якія прадстаўляюць гісторыка-культурную каштоўнасць.
– Альбо плацілі падвышаную арэндную плату, альбо адлічвалі сродкі на рамонтныя працы будынкаў. Самае цікавае, што гэты ўказ з'явіўся, як снег на галаву: ён нідзе не прапрацоўваўся, не ўзгадняўся, – падагульніў Валеры Леванеўскі.