Самая старая беларуска замярзае без газу

• 14.11.2007, 8:31

118-гадовая бабуля Аня спіць пад трыма коўдрамі і ходзіць па хаце ў футры.

У ліпені «КП в Беларуси» ездзіла ў Маладзечна віншаваць з 118-годдзем самую старую беларуску Ганну Рагель. Тады бабуля паскардзілася, што ўжо чатыры гады ўлады не хочуць праводзіць да яе газ. Да вуліцы падвялі, а да дому забыліся… Дачка Ганны Паўлаўны нават купіла кацёл і неабходнае абсталяванне, а газу няма… Тады інжынер мясцовага ЖЭСа Сяргей Пчолкін абяцаў у гутарцы з карэспандэнтам газеты, што газ у доўгажыхаркі будзе. Падмануў. Прайшло чатыры месяцы, а газу няма.

– Не ведаем ужо, што рабіць!.. – плача ў трубку дачка самай старой беларускі Любоў Аляксандраўна. – Накшталт прыйшлі падключаць, нават пліту падключылі. А кацёл не хочуць, маўляў, трэба яго перагародкай аддзяляць. Але я не ўмею сама цэглу класці!.. Умольвала ЖЭС, прасіла за грошы зрабіць… Адмахваюцца. А маці мерзне, па хаце ў футры ходзіць. Скардзіцца, што ногі ад холаду ламае. Так я бегаю ў аптэку, купляю мурашыны спірт і расціраю. Абагравальнік купіла. На ноч маці накрываю пярынай, ваўнянай коўдрай і яшчэ звычайнай зверху…