АГП могуць закрыць

• 14.01.2008, 11:43

Запыт Міністэрства юстыцыі да АГП з нагоды ўдзелу яе лідэра Анатоля Лябедзькі ў акцыі пратэсту прадпрымальнікаў можа служыць пачаткам фармальнай працэдуры ліквідацыі партыі. Такую магчымасць не выключыў намеснік старшыні АГП Яраслаў Раманчук.

«Калі Лукашэнка дасць загад закрыць партыю, яна будзе закрытая», – адзначыў ён.

Раманчук расцэньвае крокі Міністэрства юстыцыі як працяг кампаніі ціску ўлады на апазіцыйныя партыі. Асабліва ў кантэксце таго, што ў Вярхоўны суд пададзены пазоў аб закрыцці чарговай з іх – Партыі камуністаў Беларускай, паведамляе АФН.

Нагадаем, Мінюст Беларусі патрабаваў 12 студзеня тлумачэння ад АГП, ПКБ і Партыі БНФ з нагоды ўдзелу ў акцыі, якая адбылася ў Менску 10 студзеня. У мерапрыемстве ўзялі ўдзел прадстаўнікі шэрагу грамадскіх аб'яднанняў і палітычных партый, у тым ліку лідэры АГП, ПКБ і Партыі БНФ.

У гэтым звязку Мінюст патрабуе "ў трохдзённы тэрмін прадаць інфармацыю пра тое, ці былі дадзеныя асобы ўпаўнаважаныя на ўдзел у названым масавым мерапрыемстве з накіраваннем адпаведных партыйных рашэнняў".