«The Economist»: Сытуацыя з дэмакратыяй у Беларусі пагоршылася

• 31.10.2008, 9:24

У гэтым годзе Беларусь апынулася на 132-м месцы з 167-і магчымых паводле «Індэксу дэмакратыі 2008» сусьветна вядомага брытанскага тыднёвіка «The Economist».

Па ўзроўню дэмакратыі Беларусь стаіць у адным шэразе з Бахрэйнам, Анголай, і Кот д’Івуарам.

«Індэкс дэмакратыі 2008», які зьяўляецца своеасаблівым рэйтынгам дэмакратычнасьці краінаў сьвету, перадае «Радыё Свабода».

Каб скласьці гэты індэкс, у якім лік 10 адпавядае ідэальнай дэмакратыі, а 0 — поўнай аўтакратыі, экспэрты разгледзелі ў адносінах да кожнай краіны 60 паказьнікаў, разьдзеленых на пяць шырэйшых катэгорый:

а) выбарчы працэс і плюралізм;

б) грамадзянскія свабоды;

в) дзейнасьць ураду;

г) палітычная актыўнасьць;

д) палітычная культура.

Першы раз падобны індэкс «The Economist» склаў два гады таму, таму сёлета было магчыма здабіць параўнаньне. Дык вось, аказалася, што на працягу апошніх двух гадоў індэкс дэмакратыі панізіўся ў 68 краінах, павысіўся ў 56, і застаўся нязьменны ў 43.

Палітычныя формы дзяржаўнага кіраваньня на сьвеце былі разьдзеленыя брытанскім тыднёвікам на чатыры тыпы:

поўная дэмакратыя (30 краінаў);

няпоўная дэмакратыя (50);

гібрыдны рэжым (36);

аўтарытарны рэжым (51).

У гэтым годзе Беларусь з адзнакай 3.34 апынулася на 132-м месцы, у атачэньні такіх краінаў, як Бахрэйн, Ангола, Альжыр і Кот д’Івуар. Два гады таму Беларусь у падобным рэйтынгу «The Economist» была 128-й.

Паводле экспэртаў «The Economist», найбольш дэмакратыі ў Швэцыі, а потым у Нарвэгіі, Ісляндыі і Нідэрляндах.