Віктар Ганчарэнка: «Галоўнае -- мы набываем велізарны досвед і прымушаем лічыцца з сабой»

• 6.11.2008, 9:19

Галоўны трэнер БАТЭ Віктар Ганчарэнка пасля хатняга матчу 4-га тура групавога турніру Лігі чэмпіёнаў з «Зенітам» (0:2) выказаў упэўненасць, што ягоная каманда дасць бой у паўторных спаборніцтвах з «Рэалам» і «Ювентусам».

- Вядома, прысутнічае гаркота ад паразы, - прыводзіць «Прессбол» словы Ганчарэнкі. - Галоўнае, што мы цяпер набываем велізарны досвед і прымушаем лічыцца з сабой усіх супернікаў. Не магу сказаць, што для мяне было нечаканым, як згуляў сёння "Зеніт". У апошні раз ён ужыў такую тактыку ў Самары, калі перамог 3:0. Калі б у нас было больш досведу і сіл, то нам, можа быць, атрымалася б зраўняць лік, калі супернік застаўся ў меншасці. Аднак рызыка атрымаць контратаку ў гульні з такой хутканогай камандай, як "Зеніт", вельмі вялікі. Вось мы і атрымалі гол у свае вароты.

- Як бы вы інтэрпрэтавалі той факт, што ў першым тайме "Зеніт" зарабіў 19 фолаў, а БАТЭ - два?

- Мы звярнулі на гэтую ўвагу ў перапынку. Мы гулялі з нейкай павагай да суперніка. Сфалі Ліхтаровіч на чужой палове поля, мы б не атрымалі контратаку, пасля якой быў забіты першы гол. Не заўсёды перамагае той, хто мае станоўчую статыстыку.

- Ці захавае ваша каманда матывацыю на два апошніх матча групавога этапа?

- Матывацыю мы захаваем адназначна. Мы ўжо сустракаліся і з "Ювентусам", і з "Рэалам" і назапасілі некаторы досвед, няхай і адмоўны. Аднак і ён каштоўны.

- У першым тайме ваша каманда стварыла некалькі вострых момантаў пасля розыгрышу стандартных становішчаў. Вы адмыслова рыхтавалі гэтыя варыянты для "Зеніта"?

- Не хацеў бы раскрываць усе сакрэты. Але проста так нічога не атрымліваецца. Не схаваю, за кошт "стандартаў" нам хацелася забіць гол у гэтым матчы. Не атрымалася, але мы былі блізкія да гэтага. Гэта футбол, не заўсёды табе шанцуе. Напрыклад, у першым матчы галявых момантаў у "Зеніту" было больш, чым сёння. Але тады была нічыя, а зараз пры роўнай гульні яны перамаглі.