Распаўсюднік незалежнай прэсы арыштаваны, газэты канфіскаваныя

• 16.12.2008, 9:38

Супрацоўнікі міліцыі затрымалі актывіста ініцыятывы «Маладая Беларусь» Алеся Круткіна, паколькі ім падаўся падазроным пакунак, што ён нес .

Маладзёна завезьлі ў пастарунак і дзьве гадзіны распытвалі, што ён меркаваў рабіць з газэтай “Беларусь партызанская”, якую ў яго знайшлі пры асабістым даглядзе. Алесь Круткін патлумачыў, што гэтая газэта выдаецца пры падтрымцы Кангрэсу дэмакратычных прафсаюзаў і што выданьне, якое мае наклад 299 паасобнікаў, не падлягае рэгістрацыі ў якасьці пэрыядычнага сродку масавай інфармацыі, перадае "Радыё Свабода".

Супрацоўнікі міліцыі сказалі, што гэтыя тлумачэньні іх не задавальняюць, і канфіскавалі 18 паасобнікаў газэты — як паведамілі Алесю Круткіну, нібыта для экспэртызы выданьня і ягонага зьместу.