Праз 30 дзён Украіна ўвойдзе ў ВТО

• 10.04.2008, 19:56

Вярхоўная Рада Украіны ратыфікавала пратакол пра ўваход Украіны ў Сусветную гандлёвую арганізацыю (ВТО).

За прыняцце адпаведнага законапраекту прагаласавала 411 дэпутатаў пры неабходных 226. Ад галасавання ўстрымаліся толькі дэпутаты фракцыі Камуністычнай партыі.

У адпаведнасці з працэдурай далучэння да ВТО, пасля паседжання Генеральнага савету пратакол пра ўваход Украіны ў арганізацыю мусібыць ратыфікаваны Радай па 4 ліпеня. Пасля гэтага на 30-ы дзень Украіна робіцца паўнамоцным сябрам гэтай арганізацыі.

Адпаведна артыкулам 8 і 9 закону “Пра міжнародныя дамовы Украіны” і з мэтай набыцця Украінай паўнамоцнага сяброўства ў ВТО, ратыфікацыя пратаколу пра яе ўваход у арганізацыю вымагае прыняцця асобнага закону.

Сяброўства Украіны ў ВТО прадугледжвае выплату штогадовага сяброўскага ўнёску. З улікам таго, што Украіна набудзе сяброўства ў арганізацыі не з пачатку гэтага году, памер сяброўскага ўнёску будзе разлічвацца згодна з фактычнай колькасцю месяцаў, якія засталіся да канца 2008 году, што складзе каля 350 тысяч швейцарскіх франкаў (разам з аднаразовым унёскам у працоўны фонд ВТО). Прадугледжаных на гэтыя мэты сродкаў у дзяржаўным бюджэце на 2008 год дастаткова для выканання адпаведных фінансавых абавязкаў.

Таксама дэпутаты даручылі кабінету міністраў у месячны тэрмін зацвердзіць план дзеянняў па адаптацыі ўкраінскай эканомікі да ўмоваў ВТО. Адпаведную прапанову ўнёс старшыня парламента Арсен Яцанюк па выніках абмеркавання дэпутатамі законапректу.

Нагадаем, 5 лютага ў Жэневе Віктар Юшчанка і Генеральны дырэктар Сусветнай гандлёвай арганізацыі Паскаль Ламі падпісалі пратакол пра ўваход Украіны ў ВТО.

ВТО прапанавала Украіне пяць гадоў пераходнага перыяду для адаптацыі асобных яе нормаў і палажэнняў і абвясціла ўмовы ўваходу Украіны ў арганізацыю.