Ва Ўкраіне савецкія помнікі адправяць у Чарнобыль

• 11.06.2008, 12:40

Міністр культуры Ўкраіны Васіль Ваўкун прапанаваў адправіць савецкія помнікі, дэмантаваныя ў сувязі з угодкамі Галадамору, у Чарнобыль.

"Трэба вылучыць участак у чарнобыльскай зоне, зрабіць тамака музей і вадзіць экскурсіі", - растлумачыў чыноўнік.

Раней, нагадаем, прэзідэнт Украіны Віктар Юшчанка даручыў рэгіянальным адміністрацыям знесці помнікі, прысвечаныя прадстаўнікам савецкай улады, якіх кіраўніцтва краіны лічыць вінаватымі ў арганізацыі Галадамору - масавага голаду 1932-1933 гадоў.

Выступаючы на паседжанні Кардынацыйнай рады па падрыхтоўцы да 75-х угодкаў Галадамору, Ваўкун паведаміў, што дэмантаж такіх помнікаў ідзе па ўсёй краіне. Па словах міністра, якога цытуе "Карэспандэнт", больш за ўсё манументаў, што падляжаць зносу, налічваецца ў Хмяльніцкай вобласці (каля 300 адзінак, па інфармацыі Міністэрства культуры).

У пяці абласцях Заходняй Украіны, як адзначыў чыноўнік, дэмантаж такіх помнікаў ужо завершаны.