Уладзімер Лабковіч: Напярэдадні «выбараў» рэпрэсіі будуць толькі ўзмацняцца

• 30.06.2008, 13:16

Камэнтуючы затрыманьні актывістаў, праваабаронца Ўладзімер Лабковіч заявіў, што ўлады ствараюць звычайную атмасфэру, якая была напярэдадні ўсіх «выбараў».

Адносна затрыманьня Міхаіла Пашкевіча, які зьбіраўся перадаць дакумэнты аб сваім вылучэньні назіральнікам ад АГП у Цэнтральную выбарчую камісію, праваабаронца ўпэўнены, што “гэта сьведчыць толькі пра тое, што ўлады хітруюць, калі кажуць, што зьбіраюцца праводзіць незалежныя дэмакратычныя “выбары” і такімі затрыманьнямі паказваюць сваё сапраўднае стаўленьне да тых суб’ектаў, якія зьбіраюцца ўдзельнічаць у “выбарчай” кампаніі”, - цытуе Лабковіча “Радыё Свабода”.

На думку Лабковіча, напярэдадні “выбараў” улады, як і раней, ствараюць атмасфэру запалохваньня і ня маюць намеру праводзіць “выбары”, якія б хоць у мінімальнай ступені адпавядалі міжнародным стандартам свабодных выбараў.

“Па тэлебачаньні нам распавядаюць, што “выбары” будуць дэмакратычнымі і транспарэнтнымі, а ў гэты ж час садзяць актывістаў выбарчых кампаній, штабоў. Цяпер узяліся за моладзевых актывістаў, праваабаронцаў. У гэтым жа рэчышчы трэба разглядаць і затрыманьне Эдуарда Баланчука, актывіста БХК перад паседжаньнем рады БХК, дзе абмяркоўвалася пытаньне маніторынгу “выбарчай” кампаніі. Гэта дэманструе, што ўлады на словах дэкляруюць дэмакратычнасьць “выбарчага” працэсу, а праводзіць яго будуць на тым жа ўзроўні рэпрэсій, як і іншыя палітычныя кампаніі. Пакуль што нічога не кажа аб тым, што ўлады сапраўды зьбіраюцца праводзіць хоць мінімальныя “выбары”, якія адпавядаюць стандартам у галіне выбарчых працэсаў”, - сцьвярджае Ўладзімер Лабковіч.