У Беларусь упершыню прыедзе дзяржсакратар Папы Рымскага

• 5.06.2008, 13:12

18 чэрвеня ўпершыню ў Беларусь прыбудзе дзяржаўны сакратар Папы Рымскага Бенедыкта XVI кардынал Тарчызіа Бертонэ.

Аб гэтым паведаміў на прэс-канферэнцыі ў Менску мітрапаліт Менска-Магілёўскі архібіскуп Рымска-каталіцкай царквы ў Беларусі Тадэвуш Кандрусевіч.

"18-22 чэрвеня ў Беларусі па запрашэнні беларускага ўрада будзе знаходзіцца дзяржсакратар таты рымскага Бенедыкта XVI Т.Бертоне", - цытуе мітрапаліта «Інтэрфакс».

Па словах Тадэвуша Кандрусевіча, "праграма візіту складаецца з сустрэчаў з прадстаўнікамі беларускай дзяржавы, а другая частка - рэлігійная".

Пры гэтым мітрапаліт падкрэсліў, што "візіт кардынала Т.Бертоне сыграе важную ролю ў жыцці беларускіх каталікоў. Кардынал з'яўляецца другой асобай Ватыкана і бліжэйшым паплечнікам Папы Бенедыкта XVI".

У рамках свайго візіту кардынал наведае Менск, Пінск і Гародню, паведаміў Т.Кандрусевіч. Па ягоных словах, дзяржсакратар Папы Рымскага прыме ўдзел у паседжанні Канферэнцыі каталіцкіх біскупаў у Беларусі, наведае цэнтр "Карытас", які дапамагае дзецям з анкалагічнымі захворваннямі. Акрамя гэтага, кардынал высвянціць углавы камень касцёла, які будуецца ў мікрараёне Серабранка ў Менску, сустрэнецца з беларускай каталіцкай моладдзю, ускладзе кветкі да вечнага агню на плошчы Перамогі ў Менску, а таксама адслужыць літургію ў архікафедральным касцёле ў Менску. Пры гэтым мітрапаліт адзначыў, што "гэта толькі рэлігійная частка візіту кардынала ў Менск".