Загінуў гендырэктар РУП «Гомельтранснафта «Дружба». Афіцыйная версія -- утапленне

• 14.07.2008, 11:06

Па афіцыйнай версіі, генеральны дырэктар рэспубліканскага ўнітарнага прадпрыемства «Гомельтранснафта «Дружба» Аляксей Касцючэнка падчас рыбалкі патануў у Дняпры.

Аб гэтым паведамілі агенцтву «Інтэрфакс-Захад» у Рэспубліканскім таварыстве выратавання на водах (ОСВОД).

«Няшчасны выпадак адбыўся ў Брагінскім раёне ў некалькіх кіламетрах ад мяжы з Украінай. Па папярэдняй версіі, А.Касцючэнка, якому было 65 год, выпаў з маторнай лодкі падчас рэзкага павароту і не змог выбрацца на бераг», - паведамілі ў ОСВОД.

Па словах суразмоўцаў агенцтва, «у цяперашні час па дадзенай справе пракуратура праводзіць праверку». «Не выключана, што ў загінулага, які ў лодцы знаходзіўся адзін, стала дрэнна з сэрцам», - адзначылі ў ОСВОД.

«Пустую лодку з берага ўбачылі мясцовыя жыхары і паведамілі выратавальнікам», - удакладнілі суразмоўцы агенцтва.