Менскія дыскатэкі будуць патруляваць міліцыянты разам з педагогамі і бацькамі

• 3.02.2009, 12:45

Падчас спецаперацыі «Дабрабыт» у Менску супрацоўнікі міліцыі, настаўнікі і бацькі будуць патруляваць дыскатэкі і кампутарныя клубы.

Аб гэтым паведамілі агенцтву "Інтэрфакс-Захад" у ГУУС Менгарвыканкама.

"На час спецаперацыі "Дабрабыт", якая будзе праходзіць да 25 лютага, у Менску вырашылі адрадзіць савецкую традыцыю патрулявання месцаў масавага адпачынку моладзі. Патрулі з супрацоўнікаў міліцыі, настаўнікаў і бацькоў будуць наведваць дыскатэкі, кампутарныя клубы", - паведамілі ў ГУУС.

У ГУУС таксама паінфармавалі, што "увесь люты падчас аперацый "Дабрабыт" будуць наведваць па месцы жыхарства хранічных алкаголікаў, сямейных скандалістаў". "Спецаперацыя накіраваная на прафілактыку злачынстваў і правапарушэнняў у сямейна-пабытовай сферы. Паводле статыстыкі, у Менску ў сферы сямейна-пабытовых стасункаў здзяйсняецца кожнае трэцяе забойства і кожнае чацвёртае наўмыснае прычыненне цяжкага цялеснага пашкоджання", - адзначылі ў ГУУС.