Прэс-сакратар Сечына: «Выразнасці з Беларуссю няма, і калі яна з'явіцца, не вядома»
- 26.01.2010, 13:53
Масква і Менск не могуць узгадніць умовы экспарту расейскай нафты ў Беларусь.
25 студзеня віцэ-прэм'ер Ігар Сечын пачаў перамовы з першым намеснікам старшыні ўрада Беларусі Уладзімірам Сямашкам аб умовах пастаўкі нафты з Расеі ў Беларусь. Перамовы не скончыліся, будуць працягнутыя сёння, сказаў «Ведомостям» прадстаўнік сакратарыята Сечына: «Выразнасці няма, і калі яна з'явіцца, не вядома».
Масква і Менск пачалі спрачацца аб схеме паставак нафты яшчэ ў снежні, паколькі з 1 студзеня 2010 года скончваўся тэрмін дзеяння льготнага парадку, які прадугледжваў зніжкі на экспартныя пошліны на нафту, што экспартуецца ў Беларусь, у 64,4-70,7%.
Расея прапаноўвала ў канцы мінулага года Беларусі саступку - цалкам вызваліць ад пошлін нафту, якая выкарыстоўваецца для ўнутранага спажывання (6,3 млн т), а на аб'ёмы звыш гэтай квоты ўсталяваць пошліну ў 100%. Беларускі ўрад выступіў супраць такога падыходу: у рамках Мытнага саюза рэжым мытных пошлін ужывацца не павінен, упэўненыя ў Менску.
Расея незаконна спаганяе пошліны з імпарцёраў нафты ў Беларусь, заявіў 25 студзеня старшыня дзяржаўнага мытнага камітэта Беларусі Аляксандр Шпілеўскі. Згодна з пагадненнем аб парадку паставак нафты ў Беларусь з 1 студзеня гэтага года мытных пошлін на нафту не павінна быць, сказаў ён: «У той жа час Расея ўвяла пошліны. У дадзенай сітуацыі гаворка ідзе пра незаконныя дзеянні Расеі і аднабаковым выхадзе з пагаднення».
«Пазіцыя Аляксандра Шпілеўскага незразумелая, як і тое, пра які законапраект ідзе гаворка», - здзіўлены прэс-сакратар расейскага прэм'ера Дзмітрый Пяскоў. З вызначэннем па спагнанні пошлін у рамках Мытнага саюза ёсць час да 1 ліпеня, заяўляе ён: «Пакуль жа спагнанне пошлін - абавязак і прэрагатыва расейскіх уладаў».
Раней афіцыйны Менск прапаноўваў Маскве іншы варыянт: бяспошлінны пастаўкі ўсёй нафты ў студзені - лютым 2010 года, а да сакавіка распрацаваць механізм міжбюджэтнага размеркавання экспартных пошлін у рамках саюза.
Зараз пагадненне трох краін рэгулюе толькі пошліны на нафтапрадукты ў адносінах з трэцімі краінамі, але не ўнутры саюза, кажа прадстаўнік камісіі Мытнага саюза Сяргей Ткачук. Саюз прадугледжвае свабоднае перамяшчэнне тавараў, а значыць, пошліны на тавары, якія ўвозяцца і экспартуюцца, павінны быць адмененыя, адзначае Марына Лякішава з DLA Piper: «Рашэнне аб Мытным саюзе Расеі і Беларусі носіць палітычны характар, а ўмовы паставак з'яўляюцца прадметам гандлю».