Грыбаўскайтэ назвалі «выскачкай года» з-за Лукашэнкі

• 17.12.2010, 13:04

Брытанскі штотыднёвік The Economist прысвоіў прэзідэнту Літоўскай Рэспублікі Далі Грыбаўскайтэ тытул «выскачка года».

Пра гэта паведамляе ru.DELFI.lt са спасылкай на BNS.

Прычына – адмова Грыбаўскайтэ прыехаць на вячэру з прэзідэнтам ЗША Баракам Абамам і станоўчае стаўленне да беларускага дыктатара Аляксандра Лукашэнкі.

Прычынай адмовы ад вячэры з Абамам было негатыўнае стаўленне Грыбаўскайтэ да новай дамоўленасці па ядзерным стратэгічным узбраенні (START) паміж ЗША і Расеяй, чым прывяла ў шаленства адміністрацыю ЗША.

«Яна можа патрапіць у Белы Дом толькі ў тым выпадку, калі прыедзе туды з іншымі турыстамі», - цытуе The Economist ананімнага амерыканскага чыноўніка.

Выданне таксама адзначае, што «Грыбаўскайтэ, працуючы ў Еўракамісіі, дзе яна адказвала за бюджэт, выдатна выконвала свае абавязкі, але абавязкі прэзідэнта – іншыя».

Прэзідэнт Літвы адмовілася ўдзельнічаць у вячэры, арганізаванай прэзідэнтам ЗША напачатку красавіка ў Чэхіі. На вячэру былі запрошаныя лідэры краінаў Усходняй Еўропы. Грыбаўскайтэ сказала, што яна не хоча піць шампанскае за дамову, якая можа нанесці шкоду бяспецы Еўропы.