Ганчарэнка: Футбольныя матчы арганізоўваюць для спорту, а не прапаганды нацызму

• 17.08.2010, 13:56

На матчы чэмпіянату Беларусі БАТЭ - «Шахцёр» (Салігорск) сектар фанатаў з Барысава быў напалову пустым.

Заўзятары, якія паднялі на адным з матчаў лічбы 14 і 88, што азначаюць таемны нацысцкі код, пакінулі свой фан-сектар пустым ў знак пратэсту супраць мер, якія прыняў клуб у спробе пазбегнуць такіх дзеянняў у будучым.

Галоўны трэнер барысаўскай каманды Віктар Ганчарэнка выказаў «Савецкай Беларусі» меркаванне, што футбольныя матчы арганізоўваюць для спорту, а не для прапаганды нацызму.

«Калі фанаты любяць каманду, то яны будуць хадзіць на стадыён і падтрымліваць яе. Хутчэй за ўсё ў членаў фанацкай групіроўкі дзяды ваявалі, хутчэй за ўсё хтосьці з іх загінуў. І лічу, што праяўляць салідарнасць з такой нагоды недапушчальна. Калі яны не хочуць хадзіць на футбол - гэта іх права. Я не адчуў, што падтрымка трыбун сёння была слабейшай».