Дэвід Лідынгтан: Дэмакратычная Беларусь увойдзе ў Еўразвяз

• 3.09.2010, 9:44

Міністр па справах ЕЗ Вялікабрытаніі назваў умовы ўваходжання Беларусі ў Еўразвяз.

Калі праз нейкі час у будучыні Беларусь будзе адказваць эканамічным і палітычным крытэрам, яна можа стаць сябрам Еўразвяза. Такое меркаванне пра магчымасці для краіны, рэжым якой называецца «апошняй дыктатурай Еўропы», увайсці ў ЕЗ выказаў міністр па справах ЕЗ Вялікабрытаніі Дэвід Лідынгтан у чацвер на лекцыі ў Інстытуце міжнародных адносін Віленскага універсітэта, перадае ru.DELFI.lt.

Паводле яго словаў, гэта можа здарыцца толькі ў тым выпадку, калі Беларусь сама захоча стаць сябрам гэтай арганізацыі і створыць дэмакратычную палітычную сістэму, у якой палітычныя партыі дзейнічалі б свабодна, працавала б незалежная судовая сістэма, выконваліся б свабода слова, сходаў і іншыя дэмакратычныя свабоды .

«На мой погляд, сяброўства ў ЕЗ павінна быць адкрытым любой еўрапейскай краіне, якая сама жадае далучыцца і, што самае важнае, адказвае крытэрам. У такіх умовах сяброўства ў ЕЗ павінна быць адкрытым любой еўрапейскай краіне. Але ў мяне ніколі не было сумненняў, што сяброўства ў ЕЗ не павінна быць незалежным ад абставінаў.

Любая краіна, якая прыходзіць у ЕЗ, павінна адказваць крытэрам уступлення - не толькі гаворачы пра мадэрнізацыю эканомікі, але і пра незалежную судовую сістэму, свабоду СМІ, сходаў, дэмакратычную палітычную сістэму, у якой свабодна дзейнічалі б палітычныя партыі, з магчымасцю свабодна ўдзельнічаць у выбарах .Усе гэтыя крытэры - базавыя», - адказваў Лідынгтан на пытанні.

Паводле сцвярджэння брытанскага міністра, мінулыя 20 гадоў паказалі, што імкненне ўступіць у ЕЗ можа быць выдатным імпульсам для дэмакратызацыі дзяржавы. Гэта бачна па краінах Усходняй і Цэнтральнай Еўропы, вопыту Іспаніі і Грэцыі.