Былы эстонскі дыпламат абвінавачвае беларускія спецслужбы

• 3.09.2010, 11:49

Хары Лахтэйн заявіў, што яго знаёмым у Менску пагражалі псіхіятрычнай бальніцай і турмой.

Былы часовы павераны амбасады Эстоніі ў Беларусі Хары Лахтэйн, які быў абвінавачаны ў сэксуальных дамаганнях да жыхаркі Менска, заявіў, што да яго сыходу з дыпламатычнай пасады прывёў «напад з боку беларускіх спецслужбаў», паведамляе «Камсамольская праўда ў Паўночнай Еўропе».

Лахтэйн заявіў у чацвер увечары ў эфіры ETV, што ўлетку яго знаёмыя ў Беларусі звязаліся з ім і паведамілі, што шмат каго з іх выклікалі ў КДБ, дапытвалі, настойліва прапаноўвалі супрацоўніцтва і пагражалі псіхіятрычнай бальніцай.

Паводле яго словаў, вялікая колькасць фатаздымкаў, якія ў выніку і прывялі яго да адстаўкі, былі змененыя з дапамогай камп'ютэрных праграмаў.

Лахтэйн падаў заяву аб сыходзе пасля таго, як розным выданням у Эстоніі былі разасланыя ананімныя лісты з абвінавачваннямі ў яго адрас у непрыстойных сэксуальных паводзінах.

Міністэрства замежных спраў Эстоніі 24 жніўня задаволіла заяву дыпламата аб сыходзе з працы па ўласным жаданні, якую ён падаў пасля паступлення ананімных лістоў.