Аблавы на дарогах

• 14.11.2011, 15:05

Судовыя выканаўцы асвойваюць новыя формы работы.

У Менску сумесна з прадстаўнікамі ДАІ імі быў праведзены рэйд па адлове аўтамабілістаў-даўжнікоў.

Як паведамляе сайт вышэйшага гаспадарчага суда, даўжнікам па судовых пазовах чамусьці асабліва цяжка расставацца менавіта з улюбёным аўто. Пры ўтойванні маёмасці ад вопісу даўжнікі праяўляюць цуды вынаходлівасці, хаваючы ўласныя аўтамабілі.

Нейтралізаваць гэтыя схемы закліканыя сумесныя аперацыі Службы судовых выканаўцаў гаспадарчых судоў з ДАІ МУС па вышуку і затрыманні транспартных сродкаў даўжнікоў з выкарыстаннем партатыўных прылад «Аўтаўраган». Ужыванне названага прыбора дазваляе супрацоўнікам ДАІ ў плыні машын ўсталёўваць транспартныя сродкі, што шукаюцца судовымі выканаўцамі, спыняць іх, а судовага выканаўцу - здзяйсняць іх арышт і канфіскацыю.

Адна з такіх аперацый ужо прайшла ў Менску. Прычым, як піша «Народная воля», паспяхова. У ходзе рэйду такім чынам было «адлоўлена» шэсць аўтамабіляў, якія падпадаюць пад катэгорыю «арышт» або «канфіскацыя маёмасці».