Актывісты БНФ пакінулі офіс, але забілі ўваход фанерай

• 26.07.2011, 9:09

Партыя БНФ вечарам 25 ліпеня вызваліла свой ​​былы офіс на праспекце Машэрава, 8.

Выязджаючы, партыя падрыхтавала «сюрпрыз» для ЖРЭА Савецкага раёна, якое выступіла ініцыятарам высялення партыі з офіса. Актывісты партыі забілі ўваход фанерай, каб, па іхніх словах, камунальнікі прыклалі «пэўныя намаганні» для ўваходу ў памяшканне, перадае БелаПАН.

Актывісты партыі таксама распісалі сцены офіса надпісамі: «Жыве Беларусь!», «БНФ назаўжды!», «БНФ не спыніць», «Верым! Можам! Пераможам! ».

Са ўваходу ў офіс партыі быў зняты бел-чырвона-белы сцяг. «Мы яго не згортваем, а робім перадыслакацыю. Бел-чырвона-белы сцяг будзе лунаць і надалей»- заявіў старшыня партыі Аляксей Янукевіч.

Новы офіс партыі будзе размяшчацца па вуліцы Крапоткіна, 93а.