На ільготнае жыллё можна забыцца
- 11.01.2012, 16:09
У Беларусі згодна з новымі умовамі ільготныя крэдыты на будаўніцтва жылля атрымаюць 30-35% з тых, хто мае патрэбу ў паляпшэнні жыллёвых умоваў.
Пра гэта паведаміў БелТА начальнік упраўлення жыллёвага будаўніцтва Міністэрства архітэктуры і будаўніцтва Аляксандр Горваль, каментуючы ўказ № 13 «Аб некаторых пытаннях прадастаўлення грамадзянам дзяржаўнай падтрымкі пры будаўніцтве (рэканструкцыі) або набыцці жылых памяшканняў» ад 6 студзеня 2012 года.
Распрацоўнік дакумента адзначыў, што чарга з тых, хто мае патрэбу ў паляпшэнні жыллёвых умоваў, у мінулым годзе складала 866 тыс. чалавек. Каля 80% з іх прэтэндавалі на ільготныя крэдыты. «Аднак цяпер згодна з новымі умовамі ільготныя крэдыты будуць выдавацца толькі 30-35% з тых, хто мае патрэбу, гэта значыць колькасць ільготнікаў у краіне паменшыцца ў 2-2,5 разы», - падкрэсліў ён.
Аляксандр Горваль нагадаў, што ва ўказе захаваная большасць катэгорый грамадзянаў, якія і раней мелі права на ільготнае крэдытаванне будаўніцтва жылля. Да іх адносяцца ваеннаслужачыя, грамадзяне, якія маюць дзяцей-інвалідаў, інваліды з дзяцінства I і II групы, шматдзетныя сем'і, грамадзяне, якія пражываюць не менш за дзесяць гадоў у інтэрнатах, маладыя сем'і, якія маюць двух непаўнагадовых дзяцей, грамадзяне, якія пражываюць у старым і аварыйным жылым памяшканні, і іншыя.
Спецыяліст дадаў, што з пераліку ільготнікаў выключаныя грамадзяне, якія проста адносіліся да малазабяспечаных у сілу сваіх індывідуальных сямейных прыбыткаў. «Цяпер такія грамадзяне будуць крэдытавацца на іншых умовах - пад 31% гадавых, калі стаяць на ўліку тых, хто мае патрэбу, альбо па камерцыйнай стаўцы», - адзначыў начальнік упраўлення жыллёвага будаўніцтва.