Еўрадэпутат: Пры Лукашэнке ў Беларусі перамен не будзе

• 26.10.2012, 17:30

Напярэдадні прыняцця рэзалюцыі па Беларусі ў Еўрапарламенце прайшлі дэбаты па ёй.

У дакуменце, прынятым еўрадэпутатамі, гаворыцца аб непрызнанні «парламенцкіх выбараў» у Беларусі. Гербен-Ян Гербрандзі - адзін з тых членаў Еўрапарламента, хто скептычна глядзіць на магчымасць правядзення свабодных і дэмакратычных выбараў, пакуль ва ўладзе знаходзіцца Аляксандр Лукашэнка. Такое меркаванне ён выказаў падчас абмеркавання праектаў рэзалюцыі, паведамляе «Еўрарадыё».

«Парламенцкія выбары» не сталі сюрпрызам. Давайце быць сумленнымі: пакуль краінай кіруе Лукашэнка, нічога не зменіцца. Не будзе ўмоў для канкурэнцыі і свабодных выбараў. Вынік той жа: парламент без адзінага апазіцыйнага кандыдата», - сказаў ён.

Іншыя крытычныя пункты прынятай рэзалюцыі традыцыйныя - палітычныя зняволеныя, затрыманні журналістаў, прымяненне смяротнага пакарання, нявыдача віз еўрапейскім палітыкам.

Еўрадэпутат Крысціян Вігенін са змрочным гумарам ацаніў такую сітуацыю.

«Рыхтаваць рэзалюцыі па Беларусі з нечым новым становіцца ўсё цяжэй. У наступны раз мы можам задаволіцца ўсяго адной фразай: «Мы паўтараем выказаныя намі ў мінулых рэзалюцыях пазіцыі», - сказаў ён.