Беларускія грузчыкі зарабляюць у тры разы больш педагогаў

• 3.10.2012, 10:29

Часы, калі бацькі казалі дзецям «вучыся, сынок, а то пойдзеш у грузчыкі», падобна, засталіся далёка ў мінулым.

Час дыктуе новыя патрабаванні ¸ у рамках якіх адукацыя і дыплом, па меншай меры спачатку, - хутчэй клопат, чым перавага, піша infobank.by.

Кан'юнктура рынку працы складваецца такім чынам, што грузчыкі і рабочыя атрымліваюць заработную плату ў 2-3 разы вышэй выпускнікоў ВНУ.

Нярэдка праца нават дыпламаваных спецыялістаў са стажам ацэньваецца ў Беларусі на парадак ніжэй некваліфікаванай рабочай сілы.

Журналісты падрыхтавалі агляд вакансій, якія здзівілі памерам заработнай платы, і параўналі з зарплатамі маладых спецыялістаў з вышэйшай адукацыяй.

Звяртаюць на сябе ўвагу вакансіі ад кампаніі «Віталюр». Напрыклад, грузчыкам прапануецца заработная плата ў памеры 4,6 млн. рублёў. Асноўнае патрабаванне - адсутнасць шкодных звычак.

Прыбіральшчыкам памяшканняў і падсобным рабочым у кампаніі прапануюць 3,6 млн. рублёў, а аператарам ПК - усяго 3,1 млн. Па сутнасці, у банку вакансій «Віталюра» на сённяшні дзень гэта самая нізкааплочваемая спецыяльнасць. Напрыклад, зарплата касіра-кантралёра складае 5,4 млн. рублёў, апрацоўніка рыбы і морапрадуктаў - 5 млн., прадаўцоў - 4,9 млн.

Рамонтна-механічны завод «Метромаш» запрашае фрэзероўшчыкаў і электразваршчыкаў. Заработная плата - 5,6-6 млн. рублёў.

У ЗАТ «Электрасервісбуд» патрабуюцца кваліфікаваныя рабочыя прамысловай сферы, будаўнічыя рабочыя, а таксама спецыялісты сумежных прафесій. Заработная плата - ад 6,5 млн. рублёў.

Зыходзячы з маніторынгу вакансій на беларускім рынку працы, можна зрабіць выснову, што ў краіне назіраецца даволі востры дэфіцыт спецыялістаў рабочых і будаўнічых спецыяльнасцяў. Па крайняй меры, гэта тая сфера, дзе колькасць вакансій у некалькі разоў перавышае колькасць рэзюмэ. Пры гэтым заработная плата, як правіла, перавышае сярэднюю па Беларусі зарплату.

Напрыклад, вытворчаму прадпрыемству ў Заслаўі патрабуецца зваршчык, аплата працы - ад 800 даляраў.

Грузчыкам на складзе кампаніі «Авалекса» прапануецца зарплата ў памеры ад 4 да 7 млн. рублёў.

У ТАА «Каменны замак» адкрыта вакансія бетоншчыка, аплата працы - ад 5 млн. рублёў.

А што прапануюць беларускія працадаўцы спецыялістам з вышэйшай адукацыяй?

Напрыклад, МТБанк запрашае крэдытных агентаў з вышэйшай і няпоўнай вышэйшай адукацыяй, зарплата - 240-300 даляраў. Спецыялісты па аказанні рознічных паслуг і касіры ў банках могуць разлічваць у сярэднім на зарплату 2500 000-3 000 000 рублёў.

А яшчэ больш сумна выглядае карціна ў адукацыі. У большасці ўстаноў адукацыі ўзровень аплаты працы - ад 2 000 000 рублёў.

Настаўнік пачатковых класаў можа прэтэндаваць на зарплату 2 300 000-2 800 000 рублёў. Лабарантаў з вышэйшай адукацыяй запрашаюць працаваць за 150-200 даляраў.

Заработная плата сярэдняга медыцынскага персаналу складае 2 000 000-3 000 000 рублёў, вышэйшага - да 600 даляраў.

Такім чынам, прымаўка «вучэнне святло, а невучэнне цемра» сёння цалкам губляе сваю актуальнасць. Перш чым атрымліваць у Беларусі дыплом - нярэдка на платнай аснове - не перашкаджае задумацца: а ці варта аўчынка выраба?