Генадзь Фядыніч: «Мяне распранулі да ніжняй бялізны»

• 22.02.2012, 12:57

Мытнікі, якія здзяйснялі дагляд Генадзя Фядыніча, не знайшлі нічога забароненага.

Чатыры гадзіны доўжыўся дагляд старшыні прафсаюза РЭП Генадзя Фядыніча, ягонай жонкі і жанчыны, якая ехала з імі. Нічога забароненага ў прафсаюзнага лідэра і ягоных спадарожніц знойдзена не было, паведамляе praca-by.info.

Нагадаем, 21 лютага каля 21.00 на памежным пераходзе «Гудагай» беларускія памежнікі знялі з цягніка старшыню прафсаюза РЭП Генадзя Фядыніча.

Прафсаюзнага лідэра і ягоных спадарожніц папрасілі запоўніць мытную дэкларацыю і правялі дбайны асабісты дагляд. Нічога забароненага знойдзена не было.

- Вельмі непрыемная гісторыя, - распавёў Генадзь Фядыніч. - І мяне, і жанчын распранулі да ніжняй бялізны. Нічога, вядома, не знайшлі. Тым не менш, нават не папрасілі прабачэння. Адпусцілі толькі ў гадзіну ночы. Прыйшлося дабірацца да Менска на перакладных.

На думку прафсаюзнага лідэра, тое, што здарылася, сведчыць аб пільнай увазе з боку спецслужбаў.

- Зразумела, што яны па прозвішчах на квітках адсочваюць мае перамяшчэнні. Мытнікі, безумоўна, выконвалі нечае распараджэнне. Такі пільны дагляд рэдка ладзяць.