МЗС Літвы сцвярджае, што «не стаміўся ад беларускай апазіцыі»

• 16.05.2012, 11:03

Прэс-цэнтр МЗС Літвы распаўсюдзіў афіцыйную заяву.

У заяве адзначаецца, што інфармацыйнае агенцтва BNS некаторы час таму «няправільна інтэрпрэтавала словы кіраўніка МЗС», сказаныя ў адрас беларускай апазіцыі, паведамляе ІА REGNUM.

Нагадаем, што літоўскія СМІ са спасылкай на BNS апублікавалі фрагменты з інтэрв'ю міністра замежных спраў Літвы Аўдронюса Ажубаліса няўрадаваму цэнтру Cernegie Europe. Найбольш цытаванай часткай апынуліся наступныя словы кіраўніка міністэрства замежных спраў: «Я на самой справе стаміўся ад падтрымкі планаў беларускай апазіцыі. Апазіцыя раздробленая. У яе няма ніякай выразнай лініі па падрыхтоўцы да наступных выбараў... Я бачу адзін, даволі адчайны шлях. Разам з нашымі сябрамі ў Амерыцы нам трэба пачынаць думаць пра пераходны савет. Мы павінныя стварыць альтэрнатыўны цэнтр сілы. Такая паралельная структура магла б знайсці водгук у краіне. Гэта ідэя, але пакуль ніякай рэакцыі на яе з Бруселя не было».

Па словах Ажубаліса, той факт, «што нядаўна былі вызваленыя два былых апанента Аляксандра Лукашэнкі на апошніх прэзідэнцкіх выбарах, нічога не значыць».

МЗС афіцыйна заяўляе, што першае сцвярджэнне - «не цытата з інтэрв'ю, а памылка ў перакладзе, зробленая агенцтвам BNS. Далей паведамляецца, што «Ажубаліс выказаў крытычны погляд на планы беларускай апазіцыі, што часта супярэчаць адзін аднаму... Міністр выказаўся не супраць апазіцыі, а толькі супраць разнастайнасці планаў, якія пакуль не даюць адчувальных вынікаў».

МЗС Літвы, пад кіраўніцтвам Ажубаліса актыўна і ўсяляк падтрымлівае беларускую апазіцыю. Амбасадар Літвы ў Менску быў салідарна адкліканы з беларускай сталіцы, калі сваіх амбасадараў адклікалі іншыя краіны ЕЗ. Аднак у тым ліку і па віне літоўскага дыпламатычнага ведамства быў асуджаны адзін з лідараў беларускай апазіцыі Алесь Бяляцкі, дадзеныя аб руху банкаўскіх рахункаў якога Літва перадала Менску.