Ігара Сімбірова павезлі з РУУС у Мачулішчы

• 22.05.2012, 16:37

Актывіста «Гавары праўду» вывезлі з РУУС, дзе ён адбываў арышт, за 2 гадзіны да вызвалення.

Ігар Сімбіроў правёў 15 сутак у РУУС Менскага раёна. За 2 гадзіны да вызвалення яго пасадзілі ў прыватны аўтамабіль супрацоўніка міліцыі і павезлі ў невядомым напрамку, піша zapraudu.info.

Сімбіроў змог патэлефанаваць сябрам. Паводле ягонай здагадкі, міліцыянты хацелі пасадзіць яго на асіповіцкую электрычку і пракантраляваць ад'езд дадому.

Атрымаўшы гэтую інфармацыю, актывісты «Гавары праўду» пачалі ператэлефаноўвацца паміж сабой, каб прыбыць на чыгуначны вакзал Менска і сустрэць там Сімбірова.

Мабыць, іхнія тэлефонныя размовы былі зафіксаваныя спецслужбамі. Таму што аўтамабіль з Сімбіровым раптам змяніў напрамак і замест цэнтральнага чыгуначнага вакзала паехаў у напрамку Мачулішчы.