Спецдакладчык ААН патрабуе ўпусціць яго ў Беларусь

• 21.06.2012, 17:39

Беларусь - гэта краіна, якая выклікае сур'ёзную занепакоенасць у пытанні свабоды сходаў і асацыяцый.

Пра гэта заявіў БелаПАН спецдакладчык па свабодзе сходаў і асацыяцый Рады ААН па правах чалавека Майна Кая.

Ён падкрэсліў, што Беларусь дзеля яго «ў вялікім прыярытэце», у тым ліку з-за шэрагу прынятых законаў, якіясур'ёзна абмяжоўваюць права на свабоду сходаў і асацыяцый, а таксама ў цэлым дэмакратычныя стандарты.

«Акрамя таго, у мяне выклікаюць занепакоенасць выпадкі пераследу і арыштаў праваабаронцаў і прадстаўнікоў грамадзянскай супольнасці», - адзначыў Кая.

Ён падкрэсліў, што ягоны офіс накіроўваў у сталае прадстаўніцтва Беларусі пры ААН у Жэневе 4 звароты з просьбай прадаставіць інфармацыю па шэрагу пытанняў, а таксама ў верасні мінулага года рабіў запыт аб магчымасці візіту спецдакладчыка ў краіну. «Адказаў мы так і не атрымалі», - сказаў Кая.

Кая адзначыў, што яму невядомыя прычыны, па якіх беларускія ўлады не дазваляюць наведваць краіну як яму, так і іншым спецдакладчыкам. «У выпадку з Беларуссю было б лепш і карысней для ўсіх - для беларускага ўрада, спецдакладчыкаў, міжнароднай супольнасці, беларускага народа, - калі беларускія ўлады ўсё ж дазволяць мне наведаць краіну. Тады будзе магчыма працягнуць дыялог аб сітуацыі ў Беларусі », - сказаў ён.

Кая удакладніў, што ацэнка сітуацыі са становішчам прафсаюзаў таксама ўваходзіць у паўнамоцтвы ягонага мандата.