Памёр рэжысёр Аляксандр Колбышаў

• 30.07.2012, 12:10

На 52-м годзе жыцця памёр рэжысёр фільма «Ваўкі» Аляксандр Колбышаў, паведамілі ў Міністэрстве культуры Беларусі.

Рэжысёр, сцэнарыст, акцёр Аляксандр Колбышаў нарадзіўся ў 1960 годзе ў горадзе Горлаўка Данецкай вобласці (Украіна). Атрымаў дзве адукацыі – акцёрскую ў Кіеўскім тэатральным інстытуце імя І.Карпенкі-Карага ў 1987 годзе і рэжысёрскую - майстэрня Віктара Турава ў Беларускай акадэміі мастацтваў у 1998 годзе, паведамляе БелТА.

У яго біяграфіі ўдзел у баявых дзеяннях у Афганістане - у дзевятнаццацігадовым узросце Аляксандр Колбышаў праходзіў там тэрміновую службу ў ВДВ, і служэнне музе мастацтва - у 1987-1990 гадах ён працаваў акцёрам у Брэсцкім драмтэатры. Таксама акцёр зняўся ў фільмах «Атрад спецыяльнага прызначэння», «Бітва пяці воінств», «Акупацыя. Містэрыі», «Масакра».

У 2009 годзе адбылася прэм'ера фільма «Ваўкі» па матывах вядомай аднайменнай аповесці «Ваўкі» пісьменніка Аляксандра Чэкменева, у якім Аляксандр Колбышаў выступіў у якасці рэжысёра. Карціна была адзначана ўзнагародамі нацыянальных, расейскіх і ўкраінскіх кінафестывалей. Да яе рэжысёр паставіў тры кароткаметражкі: «Чорная скрыня», «Яма», «Ахвотна жыць». У Расеі Аляксандр Колбышаў удзельнічаў у стварэнні тэлесерыялаў «Опера. Хронікі забойнага аддзела», «Цені мінулага», «Знічка», «Птушка шчасця».