Нацбанк абяцае паменшыць прысутнасць на валютным рынку

• 3.08.2012, 15:54

Нацыянальны банк Беларусі мае намер у II паўгоддзі паменшыць сваю прысутнасць на валютным рынку.

Аб гэтым заявіў агенцтву «Інтэрфакс-Захад» першы намеснік старшыні праўлення НББ Юрый Алымаў.

«У далейшым дзеючы гнуткі механізм курсаўтварэння будзе захаваны, пры гэтым Нацыянальны банк мае намер паступова змяншаць сваю прысутнасць на валютным рынку. У выніку, стабільнасць курсу нацыянальнай валюты будзе ў пэўнай ступені залежаць ад узважанасці і збалансаванасці макраэканамічнай, грашова-крэдытнай і бюджэтна-падатковай палітык», - сказаў Ю.Алымаў.

Ён нагадаў, што ў I паўгоддзі 2012 года НББ ажыццяўляў куплю замежнай валюты з мэтай прадухілення залішняга ўмацавання беларускага рубля. За гэты перыяд НББ купіў замежнай валюты на Br9,6 трлн. «Нацыянальны банк перашкаджае істотнаму ўмацаванню абменнага курсу беларускага рубля пад уздзеяннем перавышэння прапановы замежнай валюты над яе попытам з мэтай недапушчэння значнага зніжэння коштавай канкурэнтаздольнасці айчынных вытворцаў на знешніх рынках і, адпаведна, пагаршэння стану знешняга гандлю», - сказаў першы намеснік кіраўніка НББ.

Ю.Алымаў таксама нагадаў, што «дэвальвацыя абменнага курсу беларускага рубля разам з рэалізацыяй комплексу мер эканамічнай палітыкі ў 2011-2012 гадах дазволілі істотна павысіць коштавую канкурэнтаздольнасць беларускіх тавараў як на замежных, так і на ўнутраным рынках». У выніку, прафіцыт знешняга гандлю за 5 месяцаў гэтага года склаў $3 млрд супраць $2 млрд у студзені-траўні 2011 года.

«Улічваючы дзеючы механізм курсаўтварэння, далейшая дынаміка абменнага курсу беларускага рубля да даляра ЗША і любой іншай валюты ў пэўнай ступені будзе залежаць ад эфектыўнасці знешнеэканамічнай дзейнасці беларускіх прадпрыемстваў, а таксама ад ваганняў узаемных курсаў асноўных сусветных валют на міжнародным фінансавым рынку», - канстатаваў ён.

Як паведамлялася, за студзень-ліпень 2012 года беларускі рубель умацаваўся да кошыка валют на 2,66% пасля дэвальвацыі на 171,73% у 2011 годзе.

З кастрычніка 2011 года НББ радыкальна змяніў курсавую палітыку і адмовіўся ад мэтавай прывязкі беларускага рубля да прагнознага калідора ваганняў, што прыводзіла да расходавання рэзерваў ва ўмовах дэфіцыту знешняга гандлю. Новая курсавая палітыка ўяўляе сабой кіраваны плаваючы курс. НББ бярэ на сябе абавязацельствы толькі па згладжванню рэзкіх ваганняў курсу за кошт рублёвых або валютных інтэрвенцый.