Журналістак будуць судзіць за фота плюшавых мішак
- 9.08.2012, 10:07
У Менску пройдзе суд над журналісткай «Камсамолкі» і фотакарэспандэнтам.
Суд над журналісткай «Комсомольской правды в Беларуси» Ірынай Козлік і фотакарэспандэнтам Юліяй Дарашкевіч, якія былі затрыманыя ў мінулую сераду, пройдзе сёння ў Менску.
«Сёння ў судзе Савецкага раёна Менска будзе разгледжана адміністрацыйная справа ў дачыненні да І.Козлік і Ю.Дарашкевіч, якія былі затрыманыя ў Менску падчас пікету», - паведамілі ў БАЖ.
Журналісткі былі затрыманыя ў сераду ўвечары ў цэнтры горада каля Палаца мастацтваў падчас фотасесіі з плюшавымі мішкамі.
У дачыненні да іх складзены пратакол аб адміністрацыйным правапарушэнні. Журналістак абвінавачваюць у незаконным пікетаванні па артыкуле 23.24 КаАП (парушэнне парадку арганізацыі або правядзення масавага мерапрыемства або пікетавання). Па дадзеным артыкуле прадугледжаны штраф да 30 базавых велічынь (1 б.в. = Br100 тыс.) або адміністрацыйны арышт.
У праваахоўных органах не каментуюць дадзены факт, паведамляе «Інтэрфакс».
На працягу ліпеня-жніўня шэраг беларускіх журналістаў прымаюць удзел у інтэрнэт-акцыі, фатаграфуючыся з плюшавымі медзведзянятамі ў знак падтрымкі затрыманага беларускім КДБ фатографа Антона Сурапіна. Той у пачатку ліпеня на сваім сайце размясціў фатаграфіі плюшавых медзведзянятаў, якія былі раскіданыя над Менскам шведскімі пілотамі пасля несанкцыянаванага перасячэння імі мяжы Беларусі на лёгкаматорным самалёце.
4 ліпеня ў беларускіх СМІ з'явіліся паведамленні аб тым, што лёгкаматорны грамадзянскі самалёт, пілатуемы падданымі Швецыі, перасёк з боку Літвы паветраную прастору Беларусі і раскідаў над Менскам і Івянцом (Менская вобласць) плюшавых мішак з заклікамі аб свабодзе прэсы ў краіне. Тады Мінабароны Беларусі заявіла, што не было парушэнняў паветранай мяжы краіны, і назвала інфармацыю аб «дэсанце плюшавых мішак» правакацыяй.
26 ліпеня Аляксандр Лукашэнка на нарадзе з сілавікамі пацвердзіў факт незаконнага ўварвання 4 ліпеня ў паветраную прастору краіны замежнага лёгкаматорнага самалёта, заявіўшы, што тыя службовыя асобы, якія не спынілі дадзеную акцыю, павінны панесці пакаранне. 31 ліпеня кіраўнік дзяржавы вызваліў ад пасады старшыні Дзяржпамежкамітэта Ігара Рачкоўскага і камандуючага ВПС і войскамі СПА Зміцера Пахмелкіна, шэрагу кіраўнікоў сілавых структур абвешчаныя вымовы.
У мінулы аўторак КДБ Беларусі прад'явіў абвінавачванні ў дапамаганні па факце незаконнага перасячэння 4 ліпеня дзяржмяжы на лёгкаматорным самалёце падданымі Каралеўства Швецыі двум беларускім грамадзянам - Антону Сурапіну і Сяргею Башарымаву.
Фота Зміцера Брушко