У Слуцку галасуюць пад пагрозай звальнення

• 20.09.2012, 10:59

Выбаршчык сам прызнаўся ў прымушэнні да датэрміновага галасавання.

Назіральнік ад КХП-БНФ Юлія Балакір, якая працавала на ўчастку № 5 па Слуцкай выбарчай акрузе № 67, стала сведкай такога выпадку.

Па словах Юліі Балакір, у другі дзень датэрміновага галасавання на ўчастак прыйшлі двое мужчын.

«У аднаго з іх пры сабе не аказалася пашпарта, і члены камісіі адмовіліся выдаць яму бюлетэнь, - распавядае «Праваабаронцам за свабодныя выбары» назіральнік. - Мужчына быў злёгку нецвярозы і адкрытым тэкстам заявіў: «Нас з працы на гадзіну раней адпусцілі, сказалі, што сёння ўсім прагаласаваць трэба, інакш звольняць». Яго калега адразу ж зашыкаў на яго: «Маўчы!». Мужчына сказаў, што працуе ў ПМК».

У першы дзень датэрміновага галасавання на гэтым участку прагаласавалі 46 чалавек, у другі - 106.

Да абеду на ўчастак прыязджала кандыдат ад улады Інэса Кляшчук і з ёй яшчэ некалькі чалавек, паведаміў Анатоль Богуш, давераная асоба кандыдата ад Беларускай сацыял-дэмакратычнай партыі «Грамада» Анатоля Юрэвіча. «У першай палове дня я назіраў на ўчастку і бачыў, як Кляшчук размаўляла са старшынёй участковай камісіі Юрыем Бандарэнкай. Пра што яны казалі, я не чуў», - заявіў Анатоль Богуш.

Ён адзначыў, што 19 верасня да абеду галасавалі 12 вайскоўцаў у форме, 10 настаўнікаў і 3 міліцыянта.