Беларусь стала лабараторыяй для дыктатур

• 20.09.2012, 14:52

Еўрапарламентарыі распавялі, чаму вылучылі Алеся Бяляцкага на прэмію Сахарава.

Дэпутат Еўрапарламента Яцэк Сарыюш-Вольскі знаходзіўся ў польскім антыкамуністычным прафсаюзе «Салідарнасць». Зараз ён з'яўляецца віцэ-старшынёй Еўрапейскай Народнай партыі. Палітык стаў ініцыятарам вылучэння Алеся Бяляцкага на атрыманне прэміі Еўрапейскага парламента, нагадвае выданне EurActiv (пераклад - charter97.org).

«Алесь Бяляцкі дастаткова вядомы ў праваабарончым руху. Яго таксама намінавалі на Нобелеўскую прэмію. Ён з'яўляецца палітвязнем, якога кінуў за краты рэжым Лукашэнкі.

Я хачу адзначыць, што Бяляцкі - сімвалічная фігура для беларускіх дэмакратаў. Ён з'яўляецца віцэ-прэзідэнтам Міжнароднай федэрацыі праў чалавека і вядомы сваёй праваабарончай дзейнасцю па ўсім свеце. У той жа час, Бяляцкі - заснавальнік і кіраўнік беларускага праваабарончага цэнтра «Вясна». Усё сваё жыццё ён прысвяціў барацьбе за правы чалавека. Смелы, з вялікай грамадзянскай мужнасцю, Алесь Бяляцкі, не вагаючыся, паставіў на карту ў гэтай барацьбе свой лёс», - сказаў Яцэк Сарыюш-Вольскі.

Палітык параўнаў беларускага палітвязня з Андрэем Сахаравым, імем якога названа прэмія, і Нэльсанам Мандэлай.

«Калі мы ўзнагароджваем чалавека такой прэміяй, мы павінны больш глыбока паглядзець на жыццё самога Сахарава. Падобную ўзнагароду павінны атрымліваць людзі, якія таксама пакутавалі за свае перакананні. Такія, як Нэльсан Мандэла, які ўсё сваё жыццё прысвяціў барацьбе за правы іншых», - назваў еўрапарламентар галоўную прычыну вылучэння Бяляцкага.

Другая прычына заключаецца ў блізкім суседстве Беларусі і ЕЗ.

«Беларусь сёння стала лабараторыяй для дыктатуры і рэпрэсій у Еўропе. Таму, мы, сябры Еўрапейскага парламента, маем асаблівы абавязак, які заключаецца ў абароне праў чалавека, каштоўнасцей і поглядаў, якія даюць нам надзею на тое, што ў будучыні такіх рэжымаў не будзе.

Мы гэта робім не для яго, а для нас. Нам трэба быць удзячнымі такім людзям, як Бяляцкі, якія кажуць нам аб шырокім сэнсе Еўропы, аб фундаментальных каштоўнасцях, якія абараняюць людзей і плацяць за гэта высокі кошт», - сказаў Яцэк Сарыюш-Вольскі.