За пацыентаў Навінак «правільна» прагаласуюць

• 21.09.2012, 15:18

Урачы ў Навінках заклапочаныя тым, каб іх пацыенты прагаласавалі на «выбарах».

У рэдакцыю «Народной воли» патэлефанавала жанчына, каб са смехам падзяліцца кур'ёзнай інфармацыяй.

Яна вярталася на таксі з Рэспубліканскай клінічнай псіхіятрычнай бальніцы ў пасёлку Навінкі пад Менскам, куды адвозіла на лячэнне сваю сястру. Ёй патэлефанаваў урач і папрасіў яе тэрмінова прывезці пашпарт сястры. Тая здзівілася: навошта?

«Ну як навошта? - адказаў доктар - «Выбары» жа ў нядзелю!»

Жанчына смяецца - яе сястра ледзь умее чытаць, акрамя таго, у яе абвастрэнне псіхічнага расстройства, які там удзел у «выбарах». Аднак урача гэтыя «нюансы» хвалявалі мала. Ну вось павінна прагаласаваць, і ўсё тут.

Парушэння закона ў гэтым, магчыма, няма - згодна з 4 артыкулам Выбарчага кодэкса, удзелу ў галасаванні не прымаюць толькі тыя грамадзяне, якія прызнаныя судом недзеяздольнымi або ўтрымлівацца ў месцах пазбаўлення волі.

І ўсё ж, такі клопат з боку ўрача выглядае некалькі абсурдна.