У Маскве ў беларуса выкралі фуру з тлушчам

• 26.09.2012, 9:00

На поўначы расейскай сталіцы невядомыя выкралі фуру з 20 тонамі ялавічнага тлушчу.

Пра гэта паведамілі ў прэс-службе маскоўскага ГУУС, перадае «Інтэрфакс».

Раніцай злачынцы падышлі да прыпаркаванага на Іжорскай вуліцы грузавіка Volvo. Кіроўцу, грамадзяніну Беларусі, яны паказалі невядомае пасведчанне. Пасля таго, як мужчына выбраўся з кабіны, яму надзелі на галаву мяшок, звязалі і на іншым аўтамабілі павезлі ў раён Сімферопальскай шашы. Там яго прыкавалі наручнікамі да дрэва.

Пацярпеламу дапамаглі вызваліцца выпадковыя мінакі. Мужчына адправіўся назад на месца паркоўкі, аднак фуры там ужо не было. Пасля гэтага ён звярнуўся ў паліцыю. Кошт выкрадзенага грузавіка разам з ялавічным тлушчам ацанілі ў 3 мільёны рублёў.