На Асіповіцкім заводзе аўтаагрэгатаў уводзяць чатырохдзёнку

• 11.04.2013, 16:10

Супрацоўнікаў завода прымушаюць пісаць заяву пра адпачынак за свой кошт на некалькі дзён.

Пра гэта сайту charter97.org паведаміў адзін з чытачоў са спасылкай на рабочых прадпрыемства.

«Усім інжынерна-тэхнічным работнікам у вуснай форме загадалі напісаць заяву пра адпачынак за свой кошт у красавіку на два дні. Прычым, адзін з дзён павінен быць пятніцай. Афіцыйнага загаду пра гэта, натуральна, няма», - сказаў ён.

Гэта азначае, што на працягу пакінутых двух тыдняў месяца рабочых дзён будзе восем, а не дзесяць.

У прыёмнай дырэктара завода Віктара Антаненкі сайту charter97.org адмовіліся паведаміць падрабязнасці аб гэтай ініцыятыве. «Афіцыйнага загаду аб гэтым не было. Больш падрабязную інфармацыю можаце даведацца ў намесніка дырэктара па кадрах, ідэалогіі і сацыяльных пытаннях Андрэя Чыгілейчыка, калі знойдзеце яго», - растлумачылі на заводзе.

Знайсці Чыгілейчыка не ўдалося, яго працоўны тэлефон не адказваў. Па словах рабочых, прымусовы адпачынак быў менавіта яго ініцыятывай.

Адкрытае акцыянернае таварыства Асіповіцкі завод аўтамабільных агрэгатаў з'яўляецца адным з найбуйнейшых у Рэспубліцы Беларусь вытворцаў вырабаў да аўтамабільнай і сельскагаспадарчай тэхнікі. Прадпрыемства ўваходзіць у склад холдынгу «БелаўтаМАЗ», на галаўным прадпрыемстве якога чатырохдзённы працоўны тыдзень ўвялі яшчэ ў сакавіку.

Асіповіцкі завод аўтамабільных агрэгатаў спецыялізуецца на выпуску дэталяў, вузлоў і камплектуючых з алюмініевага ліцця, шклопластыка, ліццёвай пластмасы, пенаполіўрэтану, дыцыклапентадыенавых смол.