Марцін Шульц: Польшча павінна перайсці на еўра

• 17.04.2013, 17:55

Кіраўнік Еўрапарламента ўпэўнены ў неабходнасці далучэння Польшчы да зоны еўра.

Пра гэта Марцін Шульц заявіў у інтэрв'ю газеце «Rzeczpospolita» (пераклад - Polskie radio).

Закранаючы цяперашнюю сітуацыю ў Еўразвязе, нямецкі палітык нагадаў, што з асноватворных дамоваў еўрапейскай інтэграцыі вынікае, што ЕЗ з'яўляецца эканамічным і валютным звязам, які прадугледжвае вядзенне адзінай грашовай палітыкі. Такім чынам, усе краіны-удзельніцы ЕЗ, за выключэннем Даніі і Велікабрытаніі абавязаныя перайсці на агульнаеўрапейскую валюту еўра.

«Для мяне асабіста Польшча з'яўляецца паўнапраўным сябрам Еўразвяза і будучым сябрам зоны еўра. Калі гэта адбудзецца - пажывём, пабачым. Але, мы не можам дазволіць сабе дзяліць Супольнасць па формуле 17 плюс 10 », - заявіў кіраўнік еўрапейкам парламента.

На пытанне аб высновах, якія павінны быць зробленыя на падставе барацьбы з цяперашнім крызісам зоны еўра Марцін Шульц адказаў, што Еўропе неабходна больш упэўненасці ў сваіх магчымасцях. Разам з гэтым, Еўразвяз для пераадолення наступстваў крызісу і выхаду з яго павінен звяртацца да больш збалансаванай стратэгіі.

«Адных мер па скарачэнні бюджэтнага дэфіцыту тут недастаткова. Давайце, дамо крызісным дзяржавам пабольш часу. Бюджэтныя абразанні як адзіны спосаб барацьбы з крызісам зусім не гарантуюць росту эканомікі і колькасці працоўных месцаў», - лічыць Марцін Шульц.

Магчымасць далучэння да зоны еўра абмяркоўваецца таксама ў суседніх з Беларуссю Латвіі і Літве.

Сейм Латвіі ўхваліў закон аб увядзенні еўра 31 студзеня. Умовы пераходу з адной валюты на іншую будуць падобнымі з тымі, па якіх у еўразону ўступалі іншыя краіны, напрыклад, Славакія, Славенія і Эстонія. Так, дзве валюты адначасова будуць дзейнічаць толькі першыя два тыдні 2014 года, пасля чаго расплачвацца ў краіне можна будзе толькі еўра. Пры гэтым кошты ў латах будуць паказваць у крамах яшчэ як мінімум паўгода.