Гэта Марс? Не, гэта Брэст

• 20.04.2013, 11:39

Стан беларускіх дарог становіцца тэмай для карыкатур.

Адну з іх размясціў у сваім акаўнце ў сацыяльнай сетцы «Фэйсбук» Уладзімір Сегенюк.

У гэтым годзе скаргі на жудасны стан беларускіх дарог паступаюць з розных гарадоў краіны. Жыхары абураюцца не толькі наяўнасцю велізарнай колькасці ям і выбоін на іх, але і няякасным правядзеннем рамонту. Так, нядаўна чытач сайта charter97.org даслаў фатаграфіі з Магілёва, на якіх відаць, што камунальнікі клалі асфальт проста ў ямы з вадой і смеццем.

У Бабруйску выбоіны на дарогах закладваюць звычайнымі цаглінамі.

Кіраўнік брэсцкага гарвыканкама паабяцаў скончыць рамонт дарожнага пакрыцця ў абласным цэнтры да 9 траўня. Ён заявіў, што рамонтныя працы ўжо пачаліся. Для іх правядзення вылучаныя 17 мільярдаў рублёў з бюджэту. У той жа час жыхары горада кажуць пра тое, што больш паловы вуліц абласнога цэнтра знаходзяцца ў дрэнным стане і рамонтныя работы на іх не ідуць.