Дуня Міятавіч плануе наведаць Менск

• 22.05.2013, 11:39

Прадстаўнік АБСЕ па пытаннях свабоды СМІ Дуня Міятавіч у пачатку чэрвеня збіраецца наведаць Беларусь.

Як паведамляе прэс-служба МЗС Беларусі, 3 чэрвеня ў Менску пройдзе семінар-трэнінг для беларускіх журналістаў па тэматыцы развіцця інтэрнэт-СМІ і анлайн-журналістыкі.

Мерапрыемства арганізуецца Офісам прадстаўніка АБСЕ па пытаннях свабоды СМІ сумесна з міністэрствам замежных спраў і іншымі зацікаўленымі ведамствамі.

Плануецца, што мерапрыемства наведае прадстаўнік АБСЕ па пытаннях свабоды СМІ Дуня Міятавіч.

Нагадаем, прадстаўнік АБСЕ па свабодзе СМІ неаднаразова выступала ў падтрымку беларускіх незалежных журналістаў і крытыкавала сітуацыю са свабодай слова ў Беларусі.

На канферэнцыі па бяспецы журналістаў, якая прайшла 23 красавіка ў Варшаве, Міятавіч заявіла, што будзе змагацца за беларускіх журналістаў.

«Я не магу ўказваць Лукашэнку ці іншаму кіраўніку дзяржавы, але я магу аспрэчваць іх дзеянні, якія не адпавядаюць абавязацельствам, выконваць якія яны пагадзіліся. Я буду працягваць рабіць гэта, не саромеючыся, і без якіх-небудзь ваганняў для таго, каб журналісты ў Беларусі і іншых краінах не былі абмежаваныя ў сваёй працы», - заявіла яна.