Надзвычайнае здарэнне ў Баранавічах: на людзей абрынуліся будаўнічыя блокі

• 27.05.2013, 17:29

(абноўлена - 18:35) У Баранавічах моцны вецер абрынуў будаўнічыя блокі з даху над уваходам у краму.

Праз моцны вецер з даху дома № 8 на вул. Леніна, дзе вядзецца капітальны рамонт, проста над уваходам у краму абрынулася цэгла і будаўнічае смецце, піша intex-press.by.

«Я збіраўся на працу, чую - грукат. На балкон выйшаў, а там такое! Праз пяць хвілін «хуткая» прыехала, бачыў, як з крамы дзяўчыну і хлопца вынеслі. «Хуткая» не едзе, мабыць, дапамагаюць на месцы», - паведаміў адзін з жыхароў гэтага дома.

Як паведамляе «Інтэрфакс-Захад», у выніку падзення газасілікатных блокаў з 5 паверха пацярпелі дзве працаўніцы будаўнічай арганізацыі з Менска.

Паводле папярэдняй інфармацыі, газасілікатныя блокі з будаўнічых лясоў упалі на жанчын у выніку моцнага ветру. Жанчыны, якія праводзілі будаўнічыя працы ў доме N 8 на вул. Леніна ў Баранавічах, схаваліся ад дажджу пад навес. Жанчын выратавала тое, што яны былі ў будаўнічых касках.

Паводле папярэдняй інфармацыі, цяжкіх траўмаў жанчыны не атрымалі. Медыкі, што прыехалі на месца здарэння, надалі дапамогу.

На месца здарэння прыехалі супрацоўнікі інспекцыі аховы працы, пракуроры, следчыя.