Новы трактар МТЗ зламаўся па дарозе на выставу

• 29.05.2013, 13:03

Інцыдэнт адбыўся на праспекце Машэрава сёння каля 12 гадзін.

Калона з некалькіх трактароў стала каля прыпынку грамадскага транспарту, недалёка ад скрыжавання вуліц Машэрава і Чырвонай у Менску. Па словах відавочцаў, у маторным адсеку адной з новенькіх машын пайшоў белы дым - мабыць, у жалезнага каня «закіпеў» рухавік, піша «Наша Ніва».

Аварыйны трактар ахоўвае патрульная машына міліцыі. Хутчэй за ўсё, калона трактароў ішла на выставу «БелАгра - 2013».

Адзначым, 29 траўня - дзень заснавання Менскага трактарнага завода.