Рассельгаснагляд: Мы не гатовыя зняць абмежаванні на пастаўкі малака з Беларусі

• 26.10.2018, 21:11

Зачыненымі для паставак застаюцца яшчэ 43 прадпрыемствы.

Расея пакуль не гатовая зняць абмежаванне на пастаўкі малочнай прадукцыі з Беларусі. Пра гэта, як паведамляе ТАСС, журналістам паведаміла афіцыйная прадстаўніца Рассельгаснагляду Юлія Мелана.

Яна таксама звярнула ўвагу на тое, што ўважае заявы Беларусі заўчаснымі.

«Рассельгаснагляд не можа пацвердзіць анансаванае беларускімі калегамі поўнае зняцце абмежаванняў на пастаўкі малочнай прадукцыі з Беларусі ў Расею. Такія выказванні з'яўляюцца вельмі заўчаснымі», - сказала Мелана.

Нагадаем, сёння міністр сельскай гаспадаркі і харчавання Леанід Заяц заявіў, што беларускі бок чакае, што пытанні ў пастаўках малака ў Расею вырашацца ў наступным месяцы.

- На сёння зачыненымі цалкам і часткова для паставак застаюцца яшчэ 43 прадпрыемствы. Мы чакаем станоўчага развязання пытання ад Расейскай Федэрацыі па пяці прадпрыемствах. Чакаем, што пытанні вырашацца ў лістападзе месяцы, - заявіў Заяц.

15 кастрычніка прэм'ер-міністр РФ Дзмітрый Мядзведзеў даручыў Мінсельгасу і Рассельгаснагляду ўзгадніць з Беларуссю пытанні пастаўкі сырога і сухога малака ў РФ. Пры распрацоўцы ўзгодненых падыходаў асаблівую ўвагу неабходна надаць забеспячэнню бяспекі прадукцыі, якая пастаўляецца, падкрэсліваецца ў паведамленні прэс-службы кабінета міністраў РФ. Пра выкананне даручэння неабходна далажыць ва ўрад да 11 снежня 2018 года.