Францыя заклікала да склікання Рады бяспекі ААН праз хімічную атаку ў Сірыі

• 8.04.2018, 20:28

Пасяджэнне Рады бяспекі ААН можа адбыцца ў панядзелак, 9 красавіка.

Кіраўнік МЗС Францыі Жан-Іў Ле Дрыян назваў паведамленні аб хімічнай атацы на мірнае насельніцтва ў сірыйскім горадзе Дума «вельмі трывожным» і заклікаў да правядзення пасяджэння Рады Бяспекі ААН.

Пра гэта паведамляе РБК са спасылкай на Reuters.

Ле Дрыян адзначыў, што Францыя рашуча асуджае абстрэлы горада Дума сірыйскім войскам, якія адбыліся ў апошнія 24 гадзіны. «[Гэта] агіднае парушэнне міжнароднага гуманітарнага права», - адзначыў французскі міністр.

Францыя будзе працаваць разам з хаўруснікамі, каб высветліць, ці сапраўды ў Думе выкарыстоўвалася хімічная зброя, дадаў ён.

Еўрапейскі звяз таксама выпусціў заяву ў сувязі з сітуацыяй у Сірыі. «Сведчанні кажуць на карысць таго, што рэжым [Башара Асада] зладзіў яшчэ адну хімічную атаку», - падае Reuters вытрымку з паведамлення Еўразвязу. Брусэль таксама асуджае выкарыстанне хімічнай зброі і заклікае міжнародную супольнасць да «неадкладнага адказу».

Як паведамляе Reuters са спасылкай на дыпламатычныя крыніцы, пасяджэнне Рады бяспекі ААН можа адбыцца ў панядзелак, 9 красавіка.