Актывістка «Маці 328» паспрабавала даведацца, хто праслухоўвае яе мабільнік

• 7.06.2018, 21:59

Наталля Шарыпа напісала ў міліцыю, КДБ і МТС.

Наталля Шарыпа, актывістка руху «Маці 328», атрымала афіцыйныя адказы з нагоды праслухоўвання яе тэлефона, паведамляе сайт тэлеканала «Белсат».

Наталля Шарыпа, маці асуджанага паводле артыкула 328 КК РБ, атрымала афіцыйныя адказы з міліцыі, КДБ ды ад мабільнага аператара МТС па заявах наконт меркаванага праслухоўвання ейнага тэлефона. Як не дзіўна, ва ўсіх трох адказах гаворыцца пра адсутнасць якой-небудзь інфармацыі.

Яшчэ ў пачатку траўня Наталля мелася далучыцца да галадоўкі ўдзельніц руху «Маці 328» у іншых гарадах, пра што і хацела паінфармаваць Віцебскі гарвыканкам 3 траўня афіцыйнай заявай. Аднак заяву падаць так і не атрымалася – у гэты ж дзень за жанчынай сачылі невядомыя, і яна проста пабаялася за сваё жыццё:

«Мне вельмі цікава, што за людзі сачылі за мной 3 траўня і праслухоўвалі мой асабісты тэлефон. Бо акурат у той самы дзень, калі я наважыла занесці сваю заяву ў гарвыканкам, побач са мной хадзілі невядомыя і здымалі мяне на камеры. А ўлічваючы тое, што 328 артыкул – крымінальны, я баюся за сваё жыццё, бо гэта маглі быць прадстаўнікі крымінальнага свету».

Сваю галадоўку Наталля Шарыпа ўсё ж такі распачала, пра што паведаміла ў той жа дзень у жывым эфіры тэлеканалу «Белсат». А таксама жанчына напісала афіцыйныя лісты ў міліцыю, КДБ і ў МТС з просьбай высветліць, хто і на якой падставе праслухоўвае ейны мабільны тэлефон. Бо інакш, адкуль гэтыя невядомыя даведаліся пра візіт Наталлі ў гарвыканкам?

Цягам месяца прыйшлі ўсе тры адказы, і ў кожным з гэтых адказаў было амаль адно і тое ж: інфармацыі аб фактах праслухоўвання няма. «Гэтыя адказы, якія я атрымала, – гэта проста адпіскі. Я не спынюся на гэтым і напішу чарговую заяву ва ўнутраныя органы наконт сачэння за мной. Аднак цяпер сваю заяву я пастараюся скласці так, каб прадстаўнікі міліцыі не змаглі абмежавацца фармальнай адпіскай», – кажа Наталля.

Між іншым, Наталля сцвярджае, што пасля ейных заяваў мабільная сувязь палепшылася.