Пракурор запрасіла больш за тры гады калоніі для гендырэктара «ДорОрс»
- 7.09.2018, 19:48
Адвакаты прасілі апраўдаць Аляксандра Казлова.
Сёння ў судзе Кастрычніцкага раёна адбыліся спрэчкі, выступ пракурора і адвакатаў у справе ў дачыненні да гендырэктара «ДорОрс» Аляксандра Казлова. Пракурор запрасіла абвінавачанаму 3 гады і 6 месяцаў пазбаўлення волі ў калоніі ўзмоцненага рэжыму.
Старшая пракурор аддзела пракуратуры Менска Алена Крупеніна паведаміла tut.by, што запрасіла кіраўніку буйнога ведамаснага рытэйлера і вытворцы кветак «ДорОрс» Аляксандру Казлову 3 гады 6 месяцаў пазбаўлення волі з адбываннем пакарання ў папраўчай калоніі ўзмоцненага рэжыму і штрафам сумаю 500 базавых з пазбаўленнем права займаць пасады, звязаныя з выкананнем арганізацыйна-распарадчых і адміністрацыйна-гаспадарчых абавязкаў тэрмінам на 5 гадоў. І прасіла прызнаць абвінавачанага вінаватым паводле артыкула крымінальнага кодэксу: ч 2 арт. 210, на падставе ч. 1 арт. 14, ч. 2 арт. 210.
Гендырэктар абвінавачваецца ў крадзяжы шляхам злоўжывання службовымі паўнамоцтвамі, групай асоб паводле папярэдняй змовы і замаху на гэта злачынства.
- Гендырэктар прадпрыемства віну не прызнаў. Шкода паводле справы кампенсаваная сваякамі абвінавачанага і галоўнага інжынера Крупкевіча, у дачыненні да якога справа выдзелена ў асобную вытворчасць, - сказала пракурор.
Адвакаты прасілі апраўдаць Казлова.
Нагадаем, паводле следства, дырэктар і галоўны інжынер «ДорОрс» з чэрвеня 2016-га да кастрычніка 2017 года за кошт прадпрыемства на папярэднюю змову рамантавалі свае аўто і аўто блізкіх: BMW 525, BMW Х5, Volkswagen Passat B6 і Chevrolet Cruze. Паводле абвінавачання, аўтамабілі рамантаваліся на адным і тым жа СТА на вуліцы Карвата, з дырэктарам якога ў галоўнага інжынера «былі даверныя стасункі». У бухгалтэрыю жа падаваліся загадзя падробленыя дакументы аб выкананых работах нібыта ў службовых аўто «ДорОрс» на агульную суму больш за 11,8 тысячы рублёў.
Некалькі разоў пад выглядам працоўнай машыны «ДорОрс» рамантавалася BMW 525 (2005 года выпуску) жонкі Казлова, з якой ён цяпер у разводзе, а таксама BMW X5 сястры.