Раіса Міхайлоўская: Павінен быць дапытаны той, хто прама абвінавачваецца ў забойствах крытыкаў Лукашэнкі
- 26.12.2019, 20:37
А таксама ўсе асобы, якія маюць дачыненне да «эскадрона смерці».
Версіі пра тое, што Захаранка і Ганчар нібыта знаходзяцца ў Нямеччыне, неаднаразова правяраліся, паведаміла «Радыё Свабода» кіраўніца Беларускага дакументацыйнага цэнтра Раіса Міхайлоўская.
«Дзяржава абавязаная было атрымаць афіцыйныя дакументы з расследавання, якое праводзіў у свой час урад Нямеччыны. Я не ведаю, чаму Лукашэнка не ў курсе. У нас ёсць гэтыя дакументы, і калі Аляксандр Рыгоравіч хоча, можам яму іх падаць. Гэта, безумоўна, глупства. Што тычыцца бізнэсу ва Украіне, які нібыта меў Захаранка, - гэта таксама элементарна правяраецца. Уважаю, што гэта проста адгаворкі чалавека, які не хоча, каб на яго звалілася нейкая цень ад гэтых злачынстваў. Перш за ўсё ён павінен быць зацікаўлены, каб справы былі расследаваныя, калі ён, як ён сцвярджае, не мае ніякага дачынення да гэтых злачынстваў», - сказала Раіса Міхайлоўская.
Раіса Міхайлоўская не выключае, што папярэдняе расследаванне паводле справы зніклых адновяць фармальна, як гэта было на працягу 20 гадоў.
«Перш за ўсё, яны павінны неяк сустрэцца з Гараўскім. Былі падобныя прыклады, калі следчая Байкова выязджала за мяжу і сустракалася з падазраванымі. Гэта значыць следчы павінен сустрэцца з самім Гараўскім на нейтральнай тэрыторыі або там, дзе ён знаходзіцца, і дапытаць яго.
Потым павінны быць дапытаныя ўсе асобы, якія маюць дачыненне, па спісе, агучаным Гараўскім. Хай яны выконвалі загады, але гэта злачынныя загады, і яны павінны панесці адказнасць, калі гэта рабілі. А самае галоўнае, павінен быць дапытаны той, хто прама абвінавачваецца ў забойствах, - гэта значыць Дзмітрый Паўлічэнка», - сказала Раіса Міхайлоўская.
Міхайлоўская кажа, што раней Ульяна Захаранка неаднаразова пісала хадайніцтва следчаму з патрабаваннем дапытаць байцоў, указаных у мемарандуме Пургурыдэса (Хрыстас Пургурыдэс - дакладчык Парламенцкай асамблеі Рады Еўропы. - Заўвага.). Але ніякай інфармацыі пра тое, дапыталі іх ці не, сваякам не давалі.
Са слоў Міхайлоўскай, Юрый Гараўскі павінен быць дапытаны не ў Беларусі.
«Ні адна дзяржава, якая сябе паважае, не выдасць палітычнага ўцекача краіне, дзе да яго можа быць прымененае сярод іншага смяротнае пакаранне. Таму я не думаю, што яго сюды прывязуць. Толькі хіба ў мяшку нашы спецслужбы пастараюцца яго неяк скрасці. Дзякуй богу, што ён знаходзіцца не ў Беларусі і сам ён не рызыкне з'явіцца перад нашымі органамі. Не для таго ён ад'язджаў і рызыкаваў жыццём».