Кіеў вызначыў сем мэтаў для ўступлення ў ЕЗ і NATO

• 30.09.2019, 20:53

Імкненне ўступіць у NATO і ЕЗ замацаванае ў Канстытуцыі Украіны.

Кабінет міністраў Украіны пазначыў мэты, якія краіне неабходна дасягнуць на працягу найбліжэйшых пяці гадоў. Іх выкананне стане падмуркам для рэалізацыі курсу на атрыманне паўнапраўнага сяброўства ў ЕЗ і NATO, гаворыцца ў праграме, якую ўрад унёс у Вярхоўную Раду.

Да 2025 годзе ўлады Украіны хочуць выканаць наступныя мэты:

Эканоміка краіны павінна вырасці на 40%

Стварыць 1 млн новых працоўных месцаў

Прыцягнуць $50 млрд прамых замежных інвестыцый

Прывесці ў добры стан усе асноўныя дарогі працягласцю 24 тысяч км, пабудаваць пяць глыбакаводных партоў і 15 аэрапортаў

Забяспечыць кожнага ўкраінца на ўзроўні рэальнага пражытачнага мінімуму

Знізіць узровень забруджвання навакольнага асяроддзя прынамсі на 20%

Дасягнуць станоўчай дэмаграфічнай тэндэнцыі

Ва ўрадзе Украіны адзначылі, што найбліжэйшыя пяць гадоў будуць складанымі для краіны праз тое, што траціна бюджэту траціцца на вяртанне і абслугоўванне запазычанасці, камунальная гаспадарка вядзецца неэфектыўна, чыгуначная і рачная інфраструктуры амаль цалкам зношаныя, амаль чвэрць насельніцтва жыве за мяжой беднасці, слабой эканомікі і дзяржінстытутаў пры наяўнасці моцных манаполій і «нефармальных груп уплыву».

У Кабінеце міністраў нагадалі, што на сітуацыю таксама ўплывае вайсковы канфлікт на Данбасе, страта кантролю над Крымам і «пагроза працягу агрэсіўных дзеянняў Расеі», аж да вайсковага ўварвання.