SpaceX запусціла метэаралагічны спадарожнік новага пакалення

• 21.11.2020, 20:50

Ракета стартавала з базы ВПС ЗША Вандэнберг у Каліфорніі.

Амерыканская кампанія SpaceX у суботу ажыццявіла запуск ракеты-носьбіта Falcon 9 з метэаралагічным спадарожнікам Sentinel-6 новага пакалення. Трансляцыя вядзецца на сайце кампаніі.

Ракета стартавала з базы ВПС ЗША Вандэнберг (штат Каліфорнія) у 09:17 паводле часу заходняга ўзбярэжжа (20:17 паводле Менску).

Спецыялістам SpaceX удалося вярнуць на Зямлю першую прыступку носьбіта. Яна апусцілася побач з пускавым сталом на базе Вандэнберг праз восем хвілін пасля старту. Шматразовае выкарыстанне прыступак ракет дазваляе кампаніі Ілана Маска рабіць таннейшы кошт запускаў апаратаў на арбіту.

Sentinel-6 з'яўляецца сумесным праектам Нацыянальнага ўпраўлення па аэранаўтыцы і даследаванню касмічнай прасторы (NASA) ЗША і Еўрапейскага касмічнага агенцтва (ЕКА). Спадарожнік прызначаны для адсочвання змены ўзроўню Сусветнага акіяна. Тэрмін эксплуатацыі складае пяць з паловай гадоў. Бартавыя прылады валодаюць высокім разрозненнем, што дазваляе апарату весці назіранні, напрыклад за атлантычнай плынню Гальфстрым і за драбнюткімі ўчасткамі берагавой лініі.

NASA і ЕКА плануе выкарыстаць звесткі, якія паступаюць са спадарожніка, для больш дакладных прагнозаў надвор'я, адсочванне перамяшчэння ўраганаў і фармавання мадэляў змены клімату. Парны спадарожнік Sentinel-6B будзе выведзены на арбіту ў 2025 годзе.