Адвакат Бабарыкі і Калеснікавай Ілля Салей з'ехаў з Беларусі

• 13.08.2021, 19:41

Юрыст знаходзіцца ў Варшаве.

Юрыст экс-кандыдата ў прэзідэнты Віктара Бабарыкі і сябра яго каманды Марыі Калеснікавай Ілля Салей пакінуў Беларусь. Пра гэта Салей сам паведаміў у сваім Instagram, апублікаваўшы фота з Варшавы.

Ілля Салей быў затрыманы паводле справы Калеснікавай і Знака ў верасні 2020 года. Пасля СІЗА ён знаходзіўся пад хатнім арыштам. З 16 красавіка яму змянілі меру стрымання з хатняга арышту на заклад.

«У сувязі з вынесеным у дачыненні да Віктара Дзмітрыевіча Бабарыкі прысудам і перадачай у суд справы Машы Калеснікавай і Максіма Знака, па якой я быў затрыманы ў верасні 2020 і на сённяшні дзень застаюся абвінавачаным, а таксама прымаючы пад увагу іншыя падзеі, я прыняў вымушанае рашэнне часова пакінуць Беларусь», - піша юрыст у сваім Instagram.