Працаўнік завода: Паўгода ўжо атрымліваю па $150, жыць на такі заробак немагчыма
- 21.08.2021, 20:20
У цэхах не стае людзей.
Працаўнік заводу Павел шчыра расказаў zerkalo.io пра свае даходы і выдаткі. Павел крыху больш за месяц таму ўладкаваўся працаваць на прадпрыемства памочнікам майстра. На паўгода яму ўсталявалі заробак 400 рублёў ($160) «бруднымі».
- Тут такая сістэма, што новы працаўнік павінен прайсці шасцімесячнае навучанне. Першыя два месяцы ўводзяць у курс справы, а потым ты працуеш проста як памочнік майстра. Аклад у чалавека на навучанні блізу 400 рублёў. За вылікам падаткаў за першы месяц я атрымаў крыху больш за 380 рублёў, - распавядае працаўнік завода. - Са мной заключылі працоўную дамову на 6 месяцаў. Калі скончыцца навучанне, са мной падпішуць працоўны кантракт і я буду дапушчаны да працы. Праца вучня адрозніваецца ад працы звычайнага работніка тым, што за ім замацаваны больш дасведчаны чалавек. І ён яго навучае. Груба кажучы, ён робіць, а я павінен пераймаць. Я яму дапамагаю. Мы яго працу робім удваіх. Часам мяне прыцягваюць да чарнавых работ - дзе-небудзь штосьці разгрузіць, прыбраць і так далей. «Курс маладога байца» на вытворчасці.
Са слоў Паўла, такі заробак не толькі ў яго, але і ў іншых нядаўна ўладкаваных людзей.
- Быў на заводзе цэх, яго спынілі на рамонт. Людзей адтуль, каб не звальняць, раскідалі па іншых цэхах. Зараз рамонт скончылі, цэх запускаецца. Людзей, якія працавалі там, адправілі назад. І па ўсіх астатніх цэхах цяпер ідзе недахоп кадраў. Іх набіраюць, як і мяне, па абвестках праз цэнтр занятасці ці наўпрост праз аддзел кадраў. Усе праходзяць гэта шасцімесячнае навучанне з аплатай 400 рублёў, - працягвае суразмоўца. – Дагэтуль у мяне была нядрэнная праца, але адтуль давялося звальняцца праз велізарныя перапрацоўкі, ненармаваны працоўны дзень. Сышоў, пасядзеў месяца два дома і наважыў шукаць новае месца.
Павел кажа, што яму пашанцавала, таму што ёсць сваё жыллё і бонусы ад завода ў выглядзе інтэрната яму не спатрэбіліся. Аднак нават з улікам гэтага, на думку мужчыны, жыць толькі на такізаробак немагчыма.
- Давайце прыкінем. З'ездзіць на працу і назад на грамадскім транспарце - 80 капеек у адзін бок, 80 - у іншы. Гэта 1,6 рубля толькі на дарогу. У нас ёсць сталовая. Вось зараз паеў, абед абышоўся мне ў 4,2 рубля. Я палю, трэба пачак цыгарэт купіць. А яшчэ дома нешта прыгатаваць, сродкі гігіены купіць, парашкі. А ў міжсезонне нейкае адзенне патрэбнае, да прыкладу вятроўку купіць. Ды і на шкарпэткі, бялізну грошы патрэбныя, - пералічвае выдаткі суразмоўца. - Я сабе зрабіў падушку бяспекі: усе ведаюць, у якой краіне жывём. Быў валютны ашчадак. У лістападзе і снежні ўсё з банкаў забраў і паклаў «пад падушку». І ў выпадку чаго туды рукой залажу. Плюс падзарабляю. З'ездзіў у гараж, назбіраў металу, акумулятар стары знайшоў - здаў на 86 рублёў. Таксі па вечарах. Рублёў 40-50 можна гадзін за 6 зарабіць.
Таксама Павел кажа, што яму бацькі з лецішча перадаюць памідоры, агуркі і іншую гародніну.
- На заводзе абяцаюць заплаціць па 100 рублёў да заробку тым, хто цалкам прышчэпіцца ад каранавіруса. На днях павінен атрымаць другую дозу вакцыны. А заплацяць ці не, паглядзім, - распавядае завадчанін яшчэ пра адну крыніцу даходу, якую ён разлічвае атрымаць. - Калі б не падпрацоўкі, то было б вельмі цяжка.