Прэзідэнт Літвы: Народ Беларусі заслужыў права абраць лідара краіны
- 21.08.2021, 20:15
Пазіцыя ЕЗ што да Беларусі адназначная.
Прэзідэнт Літвы Гітанас Наўседа возьме ўдзел у саміце Крымскай платформы 23 жніўня 2021, прымеркаваным да 30-годдзя незалежнасці Украіны. Напярэдадні візіту ва Украіну прэзідэнт Літвы даў эксклюзіўнае інтэрв'ю ўкраінскаму «Радыё Свабода», паведамляе svaboda.org.
Прэзідэнт Літвы, дарэчы, адзначыў, што санкцыі могуць змяніць паводзіны як Расеі, так і Беларусі. Са слоў Наўседы, важным пытаннем для Літвы з'яўляецца гібрыдная атака рэжыму Лукашэнкі і нелегальная міграцыя.
- Фізічная мяжа з Беларуссю - гэта прыярытэт нумар адзін у маёй краіне, і мы ўжо прынялі ўсе неабходныя папраўкі да закона, каб лібералізаваць і паскорыць працэс распрацоўкі агульнай стратэгіі. У гэтым плане мы таксама разлічваем на падтрымку Еўразвязу. Працэс запушчаны, і, спадзяюся, цягам года мы зможам ліквідаваць гэты прабел, закрыць мяжу. Гэта не значыць, што мы цяпер нічога не робім і чакаем, што калі-небудзь паміж нашымі краінамі з'явіцца мяжа. Нашы прадстаўнікі і інстытуты ўжо гатовыя рэагаваць на правакацыі і інцыдэнты на мяжы. У нас гэта добра атрымліваецца.
- Гісторыі Пратасевіча і Крысціны Ціманоўскай патрэслі ўвесь свет. Ці ўважаеце вы Лукашэнку за легітымнага?
- Адразу пасля выбараў у жніўні 2020 года мы аднымі з першых сказалі, што выбары не былі празрыстымі, што вынікі гэтых выбараў нелегітымныя. Я думаю, што цяпер гэта не толькі пазіцыя Літвы, але і пазіцыя Еўрапейскага Звязу, і гэта вельмі важна адзначаць.
Пасля выбараў мы бачылі мноства інцыдэнтаў, парушэнняў правоў чалавека, палітычных зняволенняў. Я думаю, што гэтыя прыклады дэманструюць нежаданне працаваць з заходняй супольнасцю для развязання гэтай складанай сітуацыі. Пастанова тут можа быць толькі адна: мы павінны арганізаваць новыя свабодныя выбары.
Народ Беларусі заслужыў права абраць наступнага лідара краіны, і для нас гэта галоўнае і самае важнае пытанне. Усё адно, ці будзе гэты лідар геапалітычна арыентаваны на той ці іншы рэгіён, тую ці іншую краіну. Самае галоўнае, што гэта быў свабодны выбар беларускага народа.